საქართველოს ეროვნულმა საფეხბურთო ნაკრებმა ევროპის ჩემპიონატზე გამგზავრებამდე ამხანაგურ მატჩში მონტენეგრო დაამარცხა. მატჩის შემდეგ კომენტარი გააკეთა ერთ-ერთი გოლის ავტორმა, გიორგი მიქაუტაძემ.
„კარგი ემოციებია. გახარებული ვარ, რომ გოლი გავიტანე, რომ მოვიგეთ დღეს. შეგვიძლია, უკეთესად ვითამაშოთ. თურქეთთან მატჩამდე კიდევ ერთ კვირაზე მეტი გვაქვს და ვაგრძელებთ მომზადებას. [საკლუბო სეზონის შემდეგ] 2-3 დღე დავისვენე და ჩამოვედი, რომ დავეხმარო ნაკრებს“, – განაცხადა მიქაუტაძემ.
შეხვედრა პოდგორიცაში ვილი სანიოლის გუნდმა 3:1 მოიგო. მე-10 წუთზე, ანგარიში გიორგი გველესიანის პასით, რომელიც ეროვნულ ნაკრებში სადებიუტო მატჩს ატარებდა, ოთარ კიტეიშვილმა გახსნა. 33-ე წუთზე, ხვიჩა კვარაცხელიას პასით გიორგი მიქაუტაძემ სხვაობა ორამდე გაზარდა. 66-ე წუთზე მონტენეგრომ სტევან იოვეტიჩის გოლით სხვაობა შეამცირა, საბოლოო ანგარიში კი ბუდუ ზივზივაძემ 83-ე წუთზე დააფიქსირა.
10 ივნისს, საქართველოს ნაკრები გერმანიაში გაემგზავრება და ევროპის ჩემპიონატის მატჩებისთვის ფელბერტში მოემზადება.