„ნაციონალური მოძრაობა“ მხოლოდ სახელი არ იყო, კონკრეტული ადამიანები იყვნენ და ყველას თავისი როლი ჰქონდა ამ დიდ უბედურებაში, – ამის შესახებ დედაქალაქის მერმა, კახა კალაძემ მედიასთან „გირჩი – მეტი თავისუფლებისთვის“ ლიდერის, ზურაბ ჯაფარიძის განცხადების შესახებ ისაუბრა.
ჟურნალისტის კითხვაზე, რას ფიქრობს ჯაფარიძის განცხადებაზე, რომლის თანახმად „დიდი ერთობის შემთხვევაში, შიში ვისაც აქვს, „ნაცმოძრაობა“ მოვა ხელისუფლებაში, ამის დაბალანსება მოხდება“, კახა კალაძემ აღნიშნა, რომ ოპოზიციის წარმომადგენლები საკუთარი კომენტარებით აღიარებით ჩვენებებს იძლევიან.
„შიში რატომ აქვს მოსახლეობას, რომ „ნაციონალური მოძრაობა“ მოვა მთავრობაში? ესეც კარგი მაგალითია, რომ თავიანთი კომენტარებით აღიარებით ჩვენებებს იძლევიან. საზოგადოებას ეუბნებიან, რომ „ნაციონალური მოძრაობის“ წარმომადგენლები მართალია, სხვადასხვა პარტიას წარმოადგენენ, მაგრამ ჩვეულებრივი რადიკალები არიან. რა თქმა უნდა, ამ ადამიანების ხელისუფლებაში ყოფნა არის ძალიან დიდი საფრთხის შემცველი ჩვენი ქვეყნისთვის და პირველ რიგში, ჩვენი მოსახლეობისთვის. ის ძალადობა და სისხლიანი რეჟიმი ხალხს არ დავიწყებია. შეიძლება, ბევრმა ახალგაზრდამ არ იცოდეს, როგორი მმართველობა იყო „ნაციონალური მოძრაობის“ დროს, მაგრამ მოსახლეობის უმრავლესობას ძალიან კარგად ახსოვს. „ნაციონალური მოძრაობა“ მხოლოდ სახელი არ იყო, კონკრეტული ადამიანები იყვნენ და ყველას თავისი როლი ჰქონდა ამ დიდ უბედურებაში. სხვათა შორის, ზურაბ ჯაფარიძეც იმ გუნდის წევრი იყო. დღევანდელი რადიკალური ოპოზიცია სწორედ ამ პარტიიდან წამოსულებისგან შედგება. რაც არ უნდა სახელები შეიცვალონ, ხალხს კარგად ახსოვს, ვინ რას წარმოადგენს“, – აღნიშნა კახა კალაძემ.