საქართველოს პარლამენტის თავმჯდომარე ირაკლი კობახიძე უკრაინის ახლად დანიშნულ ელჩს, იგორ დოლგოვს შეხვდა. ინფორმაციას საქართველოს პარლამენტი ავრცელებს.
შეხვედრაზე ითქვა, რომ წელს საქართველოსა და უკრაინას შორის დიპლომატიური ურთიერთობების დამყარებიდან 25 წლისთავი აღინიშნება, რაც ორ ქვეყანას შორის ხანგრძლივი და მყარი მეგობრობის შესახებ მეტყველებს.
ირაკლი კობახიძის განცხადებით, ორ ქვეყანას ერთმანეთთან მჭიდრო ურთიერთობა აკავშირებს და პარლამენტს სურს, ეს ურთიერთობა კიდევ უფრო გამყარდეს. პარლამენტის თავმჯდომარის თქმით, ამ მიმართულებით აქტიურად იმუშავებს საქართველოს პარლამენტში არსებული მეგობრობის ჯგუფი, რომელიც გასულ კვირას დაკომპლექტდა და მას პარლამენტის წევრი გიორგი მოსიძე უხელმძღვანელებს.
იგორ დოლგოვმა თქმით, საქართველოს პარლამენტთან თანამშრომლობის გაღრმავებისთვის აქტიურად მუშაობს უკრაინის პარლამენტში (უმაღლეს რადაში) არსებული მეგობრობის ჯგუფიც.
შეხვედრაზე განიხილეს საქართველოსა და უკრაინის ევროპულ და ევროატლანტიკურ სტრუქტურებში ინტეგრაციის პროცესიც. მხარეებმა, ასევე ილაპარაკეს საქართველოს ოკუპირებულ ტერიტორიებზე არსებულ ვითარებასა და უკრაინაში მიმდინარე მოვლენებზე.