თბილისის მერი დავით ნარმანია აცხადებს, რომ საკრებულოს ოპოზიცია შოუს დადგმას ცდილობს და მათ ამის საშუალებას არ მისცემს. თბილისის მერი საკრებულოს წინაშე აპრილში ანგარიშით წარსდგება.
“მე არ უგულვებელვყოფ საკრებულოს, საკრებულოსადმი ჩემი განსაკუთრებული პატივისცემა არაერთხელ გამომიხატავს. მივსულვარ საკრებულოში წლიური ანგარიშით და გასულ წელს რიგგარეშე სხდომაზეც ორჯერ ვიყავი. წელსაც, აპრილის თვეში ვაპირებ წარვსდგე ანგარიშით საკრებულოს წინაშე, ამის პრობლემას ვერ ვხედავ. უბრალოდ, უმცირესობას სხვა რამ ამოძრავებს და ამ სხვა რაღაცის რეალიზაციაში ხელი არ შევუწყე. მათი გეგმები შოუს მოწყობასთან დაკავშირებით არის ჩაშლილი და რა გზას და რა ხერხებს მიმართონ, უკვე აღარ იციან. თხოვეს ორ საერთაშორისო ორგანიზაციას. მათ ჩვენც მივაწოდეთ ინფორმაცია და მივაწვდით კიდეც, თუ ვინმეს რამე დააინტერესებს. ცამდე მართლები ვართ და საკრებულოშიც მივალთ”, – აღნიშნა დავით ნარმანიამ.
კომენტარები