ჩვენს აფხაზ და ოს დებსა და ძმებს დავიბრუნებთ მშვიდობისა და ეკონომიკური წინსვლის პოლიტიკით და ამ ეკონომიკური კეთილდღეობით და არა ისე, რომ „კარგი დროა ცხინვალში და აფხაზეთში გასასეირნებლად“, – განაცხადა ფრაქცია „ქართული ოცნების“ თავმჯდომარის მოადგილე ირაკლი კირცხალიამ „დღის ქრონიკაში“ ეკონომიკური ზრდის თემაზე საუბრისას.
მან აღნიშნა, რომ ეკონომიკური ზრდა მხოლოდ მშვიდობითა და პრაგმატული პოლიტიკით მიიღწევა.
„მთავარი ფსონი, რასაც „ქართული ოცნება“ დებს, ეს არის მშვიდობა და მშვიდობაზე დაფუძნებული პრაგმატული პოლიტიკა. მშვიდობა და პრაგმატიზმი არის ის კრედო და მთავარი მამოძრავებელი, რაც გვაძლევს ამხელა ეკონომიკურ ზრდას. გამორიცხულია, მშვიდობისა და პრაგმატული პოლიტიკის გარეშე გვქონდეს ამხელა ეკონომიკური ზრდა. შეგახსენებთ, რამდენიმე კვირის წინ როგორი ჟივილ-ხივილი ჰქონდათ რამდენიმე პუნქტით ლარის ვარდნაზე და ამაზე ძალიან დიდ იმედებს ამყარებდნენ. გამოვედით ჩვენც, საფინანსო საპარლამენტო გუნდის წევრებიც, გამოვიდა ფინანსთა სამინისტრო, ეროვნული ბანკი და ავხსენით, რასთან იყო ეს დაკავშირებული, რომ ეს იყო ერთჯერადი. ეს ჩვეულებრივი მოვლენა იყო და დასტაბილურდებოდა. ვნახეთ, რომ ქმნიდნენ აპოკალიფსურ სცენარს, მათ სხვა არაფერი აქვთ – ჩასაფრებულები არიან, რომ ოდნავ, პატარა რყევაზე ქვეყანა დააქციონ, ეს სწყურიათ მათ“, – განაცხადა ირაკლი კირცხალიამ.
მისი თქმით, მადლობას იმსახურებენ ეროვნული ბანკი და ფინანსთა სამინისტრო.
„დიდი მადლობა ეკუთვნით ეროვნულ ბანკს, ფინანსთა სამინისტროს. ტყუილად არ ვსაუბრობდით, რომ ეროვნულ ბანკში რეზერვების დივერსიფიცირება და ქვეყნის ეკონომიკური დივერსიფიცირება სწორად ხდება. ასე გავაგრძელებთ. მშვიდობით, პრაგმატულად გავაგრძელებთ ამ ქვეყნის მართვას იმიტომ, რომ ჩვენთვის მთავარი არის ჩვენი საზოგადოება, ჩვენი მოსახლეობა და ჩვენი ქვეყნის მშვიდობიანი განვითარება. ჩვენს აფხაზ და ოს დებსა და ძმებს ჩვენ დავიბრუნებთ აი, ამ პოლიტიკით, ამ მშვიდობისა და ეკონომიკური წინსვლის პოლიტიკით და ამ ეკონომიკური კეთილდღეობით და არა ისე, რომ „კარგი დროა ცხინვალსა და აფხაზეთში გასასეირნებლად“, – აღნიშნა ფრაქცია „ქართული ოცნების“ თავმჯდომარის მოადგილემ.