ჩინეთმა ნატო სხვების ხარჯზე უსაფრთხოების ძიებაში დაადანაშაულა და ალიანსს განუცხადა, რომ იგივე ქაოსი არ შემოიტანოს აზიაში. ინფორმაციას ამის შესახებ სააგენტო The Associated Press-ი ავრცელებს.
მანამდე ნატომ ჩინეთი მოიხსენია, როგორც გადამწყვეტი ფაქტორი, რომელიც ხელს უწყობს რუსეთის ომს უკრაინის წინააღმდეგ.
„ნატოს მიერ უკრაინის საკითხზე ჩინეთის პასუხისმგებლობის გაზვიადება არაგონივრულია და სახიფათო მოტივები აქვს“, – აღნიშნა ჩინეთის საგარეო უწყების სპიკერმა, ლინ ცზიანმა.
მან ხაზგასმით აღნიშნა, რომ ჩინეთს არასდროს გადაუცია ლეტალური იარაღი კონფლიქტის რომელიმე მხარისთვის და ორმაგი დანიშნულების პროდუქციის ექსპორტის მკაცრ კონტროლს აწარმოებს.
„ჩინეთი მოუწოდებს ნატოს, შეწყვიტოს ჩინეთის შიდა საქმეებში ჩარევა და ჩინეთის იმიჯის შელახვა და არ შექმნას ქაოსი აზია-წყნარი ოკეანის რეგიონში ევროპაში არეულობის შექმნის შემდეგ“, – დასძინა მან.