სახელმწიფო მინისტრმა, თეა ახვლედიანმა ქუთაისში ოკუპირებული რეგიონებიდან ჯანდაცვის სერვისების მიღების მიზნით გადმოსული პაციენტების მხარდაჭერისა და დროებითი განთავსებისთვის მოწყობილი სივრცეები მოინახულა.
კონფლიქტის შედეგად დაზარალებულ მოსახლეობაზე ზრუნვა და მათი მძიმე სოციალურ-ეკონომიკური მდგომარეობის გაუმჯობესება საქართველოს მთავრობის შერიგებისა და ჩართულობის პოლიტიკის ერთ-ერთ უმთავრეს პრიორიტეტს წარმოადგენს, რაც, მათ შორის, ოკუპირებულ რეგიონებში მცხოვრები მოსახლეობისთვის ხარისხიან სამედიცინო მომსახურებაზე წვდომის უზრუნველყოფას გულისხმობს.
აფხაზეთისა და ცხინვალის რეგიონიდან სამედიცინო მომსახურების საჭიროების მქონე პირების მხარდაჭერისა და პაციენტების უსასყიდლოდ განთავსებასთან დაკავშირებული საორგანიზაციო პროცესების მართვის მიზნით, სახელმწიფო მინისტრის აპარატის მიერ ასოციაცია ,,მშვიდობიან და საქმიან კავკასიას” ქუთაისში მდებარე შენობა-ნაგებობა დროებითი სარგებლობის უფლებით გადაეცა.
თეა ახვლედიანმა ადგილზე ჩატარებული სარეაბილიტაციო სამუშაოები, განახლებული ინფრასტრუქტურა, მათ შორის შშმ პირებზე ადაპტირებული სივრცე დაათვალიერა და ოკუპირებული ტერიტორიებიდან გადმოსულ პაციენტებსა და მათ თანმხლებ პირებს შეხვდა. სახელმწიფო მინისტრმა ასევე სამუშაო შეხვედრა გამართა საქართველოს მთავრობის სამშვიდობო ინიციატივის, „ნაბიჯი უკეთესი მომავლისკენ“ ფარგლებში მიმდინარე ქართულ-აფხაზური პროექტების მონაწილე პირებთან.
„შერიგებისა და ჩართულობის სახელმწიფო პოლიტიკის ფარგლებში, ხელოვნურად გაყოფილი საზოგადოების წევრებს შორის ნდობის მშენებლობისა და შერიგების მიმართულებით უაღრეს მნიშვნელობას ვანიჭებთ ოკუპირებულ ტერიტორიებზე მცხოვრებ მოსახლეობაზე ზრუნვას, განსაკუთრებით, ხარისხიან სერვისებსა და უფასო სამედიცინო მომსახურებაზე წვდომის ხელშეწყობის თვალსაზრისით. ოკუპირებული რეგიონებიდან გადმოსულ მოსახლეობას შესაძლებლობა აქვს, ჩაერთოს ჯანდაცვის სხვადასხვა პროგრამაში და მიიღოს მათ საჭიროებებსა და ინტერესებზე მორგებული მაღალკვალიფიციური სერვისი. სამედიცინო მომსახურების მიღების პროცესში ჩვენთვის მნიშვნელოვანია როგორც პაციენტების, ისე მათი თანმხლები პირების მხარდაჭერა. სწორედ ამ მიზნით სახელმწიფო ხელს უწყობს დროებითი და უსასყიდლო განთავსების სივრცეების მოწყობასა და განვითარებას. ამ კუთხით, ვფიქრობ, მნიშვნელოვან ფუნქციას შეასრულებს ქუთაისში რეაბილიტირებული შენობა, რომელიც სახელმწიფომ სწორედ კონფლიქტის შედეგად დაზარალებული ადამიანებისთვის მომსახურების მიზნით გამოყო. სამშვიდობო პოლიტიკის ფარგლებში, ჩვენ კვლავ გავაგრძელებთ ძალისხმევას ოკუპირებულ რეგიონებში მცხოვრები მოსახლეობის მხარდაჭერისა და დახმარების მიმართულებით“, – განაცხადა სახელმწიფო მინისტრმა, თეა ახვლედიანმა.