გიორგი კვირიკაშვილი უვიზო რეჟიმის ამოქმედებისთანავე, ახალგაზრდებთან ერთად, ევროპაში გაემგზავრება.
როგორც ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ვიქტორ დოლიძემ გადაცემაში „იმედის დრო“ განაცხადა, პირველი ქვეყანა, სადაც პრემიერი გაემგზავრება, საბერძნეთი იქნება.
„პირველი ქვეყანა არის ევროპის, მრავალპარტიული, პარლამენტარული, დემოკრატიის ფუძემდებელი ქვეყანა, რომელსაც ჰქვია საბერძნეთი და რა თქმა უნდა ბრიუსელი, რომელიც ასევე დემოკრატიის აკვანია. ბუნებრივია, ამას გავაკეთებთ და ეს არ იქნება დიპლომატიური პასპორტებით, ეს მოხდება ბიომეტრული, წითელი, ჩვეულებრივი პასპორტებით“,- აღნიშნა ვიქტორ დოლიძემ.
უვიზო რეჟიმის ამოქმედებისთანავე ახალგაზრდებთან ერთად, ევროპაში გამგზავრების შესახებ პრემიერ-მინისტრმა, გიორგი კვირიკაშვილმა, თებერვლის თვეში, თავად განაცხადა.
„უვიზო რეჟიმის ამოქმედებისთანავე, ახალგაზრდებთან ერთად, ევროპაში ქუთაისიდან გავემგზავრები” , – აღნიშნა პრემიერმა.
საქართველოს მოქალაქეები ევროკავშირის/შენგენის წევრ ქვეყნებში მოკლევადიანი ვიზიტით უვიზოდ გამგზავრებას 28 მარტიდან შეძლებენ.