აშშ-ის შიდა უსაფრთხოების დეპარტამენტის გენერალურმა ინსპექტორმა განაცხადა, რომ გამოძიება დაიწყო საიდუმლო სამსახურის მიერ დონალდ ტრამპის უსაფრთხოების უზრუნველყოფასთან დაკავშირებით. ინფორმაციას ამის შესახებ სააგენტო The Associated Press-ი ავრცელებს.
გამოძიების მიზანია შეერთებული შტატების საიდუმლო სამსახურის მიერ უსაფრთხოების ზომების განხორციელების შეფასება 2024 წლის 13 ივლისს ტრამპის წინასაარჩევნო ღონისძიების დროს.
საიდუმლო სამსახურის დირექტორმა, კიმბერლი ჩიტლიმ განაცხადა, რომ მისი უწყება სრულად იქნება ჩართული გამოძიებაში, ისევე როგორც კონგრესის კომიტეტებთან მუშაობაში.
აშშ-ის გამოძიების ფედერალური ბიურო (FBI) აცხადებს, რომ სროლა, რომელიც აშშ-ის ყოფილი პრეზიდენტის, დონალდ ტრამპის მიტინგზე მოხდა, ყოფილი პრეზიდენტის მკვლელობის მცდელობა იყო.
აშშ-ის სენატის შიდა უსაფრთხოების კომიტეტის თავმჯდომარემ, გარი პიტერსმა განაცხადა, რომ კომიტეტი იწყებს ორპარტიულ გამოძიებას ყოფილი პრეზიდენტის, დონალდ ტრამპის მკვლელობის მცდელობის შესახებ.