საქართველოს ინიციატივები, რომელიც შავ ზღვაზე წყალქვეშა და ოპტიკურ-ბოჭკოვანი კაბელების გაყვანას გულისხმობს, მეტ ენერგოდამოუკიდებლობისა და უსაფრთხოების მომტანი იქნება. ამის შესახებ საქართველოს საგარეო საქმეთა მინისტრმა ილია დარჩიაშვილმა მის უნგრელ კოლეგასთან პიტერ სიიარტოსთან ბუდაპეშტში გამართულ ერთობლივ პრეს-კონფერენციაზე განაცხადა.
„ჩვენ მივესალმებით უნგრეთის აქტიურ ჩართულობას შავი ზღვის რეგიონში დაკავშირებადობის გაძლიერებისთვის. ჩვენ გვჯერა, რომ საქართველოს ინიციატივები, როგორიცაა შავი ზღვის წყალქვეშა კაბელი და ოპტიკურ-ბოჭკოვანი კაბელი, და აგრეთვე საბორნე გადაზიდვის მომსახურება შესაძლოა ეფექტური გადაწყვეტილება გახდეს ენერგოდამოუკიდებლობისა და უსაფრთხოების ამაღლების საქმეში“, – თქვა დარჩიაშვილმა.
საქართველოს საგარეო საქმეთა მინისტრმა ასევე აღნიშნა, რომ თბილისისა და ბრიუსელის საერთო ინტერესს შავ ზღვაზე თავისუფალი ვაჭრობისა და ენერგიის გადაცემის ალტერნატიული მარშრუტების გამოყენება წარმოადგენს.