უკრაინის პრეზიდენტმა ვოლოდიმირ ზელენსკიმ საკუთარ ტელეგრამ არზე დაწერა, რომ ქვეყნის უმაღლესი რადის ყოფილი დეპუტატის ირინა ფარიონის მკვლელობის საქმის გამოძიების ფარგლებში ყველა ვერსია მოწმდება, მათ შორის რუსული კვალიც.
„მუშავდება ყველა ხელმისაწვდომი სათვალთვალო კამერების ჩანაწერები, ხდება თვითმხილველების გამოკითხვა, მოწმდება მიმდებარე უბნები. მუშავდება ყველა ვერსია, მათ შორის რუსული კვალიც“, – დაწერა მან.
მისი თმით, მას დილიდან საგამოძიებო მოქმედებების მიმდინარეობის შესახებ უკვე მოახსენეს ქვეყნის შინაგან საქმეთა მინისტრმა იგორ კლიმენკომ და უკრაინის უსაფრთხოების სამსახურის ხელმძღვანელმა ვასილი მალიუკმა.
ფარიონი პარასკევს მოკლეს. უცნობმა პირმა მას მის საცხოვრებელ სახლთან ცეცხლსასროლი იარაღიდან ესროლა და მიიმალა. ფარიონი საავადმყოფოში გადაიყვანეს, თუმცა მისი გადარჩენა ვერ მოხერხდა.
ირინა ფარიონი უკრაინის მე-7 მოწვევის პარლამენტის დეპუტატი იყო 2012-2014 წლებში.