,,ან იომებთ ან წახვალთ“ – ქართველი ხალხის უდიდესი უმრავლესობის არჩევანს, ანუ მმართველ პარტიას ამ სიტყვებით ემუქრებიან. ეს არის პირველი საჯარო და ზუსტი ციტირება იმ სიტყვების, რომლებიც ხშირად ესმით „ქართული ოცნების“ ლიდერებს საქართველოს ე.წ. პარტნიორებისა და ე.წ. მეგობრებისგან.
როგორც ჩანს, ეს არის მუქარის მხოლოდ ერთ-ერთი ფორმა და ზღვაში წვეთი, რომელიც პარტიის საპატიო თავმჯდომარემ გაახმიანა. სათქმელი ბევრია და ამაზე საარჩევნო კამპანიის გახსნისას ბიძინა ივანიშვილის ნათქვამიც მიუთითებს. აქცენტი ქართველი ხალხის ფიზიკურ და სულიერ გადარჩენაზე კიდევ ერთხელ ადასტურებს გლობალური ომის პარტიის ზრახვებს საქართველოსთან მიმართებით. კიდევ ერთხელ ცხადყოფს გარე ძალებისგან მომდინარე უდიდეს საფრთხეს – ,,მეორე ფრონტს“ რომლის აცილება, დიდი შანტაჟის, მუქარისა და მასირებული შეტევის მიუხედავად ჯერჯერობით ხერხდება.
რა იქნება 26 ოქტომბრის შემდეგ ეს უპირობოდ ქართველი ხალხის გადასაწყვეტია, არჩევანი მშვიდობის დასაზღვევად, როგორც არასოდეს – მარტივია.
„ქართული ოცნების“ ახალ ოფისს პირველად „იმედის კვირაში“ ნახავთ. მმართველ პარტიას ახალ მისამართზე საარჩევნო კამპანიისა და ახალი ოფისის გახსნიდან მეორე დღეს ვესტუმრეთ. მასპინძლობა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ გაგვიწია.
რა ხდებოდა ჩვენს სტუმრობამდე ერთი დღით ადრე ოფისში და რა გზავნილებით გახსნა ,,ქართულმა ოცნებამ“ საარჩევნო კამპანია, ეს ნაწილობრივ უკვე გითხარით და ბუნებრივია, რეპორტაჟის ერთ-ერთი მთავარი ხაზი ლიდერების განცხადებები იქნება.
გზავნილები, რომელთა ადრესატიც არის ყველა, როგორც ქვეყნის შიგნით, ასევე ქვეყნის გარეთ.