აშშ-ის ყოფილი პრეზიდენტი, ბარაკ ობამა საარჩევნო რბოლიდან გასვლის შესახებ აშშ-ის პრეზიდენტის, ჯო ბაიდენის გადაწყვეტილებას სოციალურ ქსელში ეხმაურება.
„ჯო ბაიდენი ამერიკის ერთ-ერთი ყველაზე მნიშვნელოვანი პრეზიდენტი იყო, ასევე ჩემი ძვირფასი მეგობარი და პარტნიორი. დღეს მან ჩვენ ასევე შეგვახსენა, რომ ის უმაღლესი დონის პატრიოტია“, – განაცხადა ბარაკ ობამამ.
„მან ხელი შეუწყო პანდემიის დასრულებას, შექმნა მილიონობით სამუშაო ადგილი, შეამცირა მედიკამენტების ღირებულება, მიიღო იარაღის უსაფრთხოებასთან დაკავშირებით მნიშვნელოვანი კანონმდებლობა, უდიდესი ინვესტიცია ჩადო კლიმატის ცვლილების მოგვარების საკითხში და იბრძოდა შრომითი უფლებების უზრუნველსაყოფად. საერთაშორისო დონეზე მან აღადგინა ამერიკის პოზიცია, გაააქტიურა ნატო და მოახდინა მსოფლიოს მობილიზება უკრაინაში რუსეთის აგრესიის წინააღმდეგ“, – აღნიშნა ობამამ.
აშშ-ის პრეზიდენტი, ჯო ბაიდენი საპრეზიდენტო რბოლას გამოეთიშა. გავრცელებულ განცხადებაში, ჯო ბაიდენმა აღნიშნა, რომ ეს ნაბიჯი პარტიისა და ქვეყნის საუკეთესო ინტერესების გათვალისწინებით გადადგა. ბაიდენმა მხარი დაუჭირა კამალა ჰარისის „დემოკრატიული“ პარტიის საპრეზიდენტო კანდიდატად წარდგენას.