უკრაინა მადლიერია პრეზიდენტ ბაიდენის ურყევი მხარდაჭერისთვის უკრაინის თავისუფლებისთვის ბრძოლაში, რომელიც შეერთებული შტატების ორპარტიულ მხარდაჭერასთან ერთად იყო და კვლავაც რჩება კრიტიკულად მნიშვნელოვნად, – ასე გამოეხმაურა უკრაინის პრეზიდენტი ვოლოდიმირ ზელენსკი ჯო ბაიდენის გადაწყვეტილებას საპრეზიდენტო რბოლიდან გამოთიშვის შესახებ.
„ბოლო წლებში ბევრი მტკიცე გადაწყვეტილება იყო მიღებული. ისინი გვემახსოვრება, როგორც პრეზიდენტ ბაიდენის გაბედული ნაბიჯები რთული პერიოდის საპასუხოდ. ჩვენ პატივს ვცემთ დღევანდელ რთულ, მაგრამ მტკიცე გადაწყვეტილებას. ყოველთვის მადლობლები ვიქნებით პრეზიდენტ ბაიდენის ლიდერობისთვის. მან მხარი დაუჭირა ჩვენს ქვეყანას ისტორიის ყველაზე დრამატულ მომენტში – დაგვეხმარა პუტინის მიერ ჩვენი ქვეყნის ოკუპაციის თავიდან აცილებაში და აგრძელებდა ჩვენს მხარდაჭერას მთელი ამ საშინელი ომის განმავლობაში“, – წერს ზელენსკი.
აშშ-ის პრეზიდენტი, ჯო ბაიდენი საპრეზიდენტო რბოლას გამოეთიშა. გავრცელებულ განცხადებაში ჯო ბაიდენმა აღნიშნა, რომ ეს ნაბიჯი პარტიისა და ქვეყნის საუკეთესო ინტერესების გათვალისწინებით გადადგა. ბაიდენმა მხარი დაუჭირა კამალა ჰარისის „დემოკრატიული“ პარტიის საპრეზიდენტო კანდიდატად წარდგენას.