„რატომ დანებდა ჯო ბაიდენი?“ – ამ სათაურით სტატიას Politico აქვეყნებს. გამოცემა წერს, რომ პრეზიდენტის საარჩევნო შტაბმა შიდა გამოკითხვები ჩაატარა, სადაც გამოვლინდა, რომ ნოემბრის არჩევნებში ჯო ბაიდენს გამარჯვების შანსი აღარ ჰქონდა.
Politico ხუთ ანონიმურ წყაროზე დაყრდნობით იუწყება, რომ პრეზიდენტს კანონმდებლებმა პირადად მიაწოდეს მისი პოლიტიკური კარიერის პოტენციური აღსასრულის შესახებ ახალი ინფორმაცია. ბაიდენს ასევე განუმარტეს, რომ მის საარჩევნო კამპანიაში დონორებისგან შემოწირულობებმა საგრძნობლად იკლო.
Politico-ს ცნობით, სწორედ ამ ინფორმაციაზე დაყრდნობით გადადგა ბაიდენმა საბოლოო ნაბიჯი და გადაწყვეტილების შესახებ კვირას, 21 ივლისს ჯერ მხოლოდ უახლეს გარემოცვას აცნობა, თეთრი სახლის პერსონალმა და საარჩევნო შტაბმა კი ბაიდენის გადაწყვეტილების შესახებ მის გასაჯაროებამდე ერთი წუთით ადრე შეიტყვეს.
აშშ-ის პრეზიდენტი, ჯო ბაიდენი საპრეზიდენტო რბოლას გამოეთიშა. გავრცელებულ განცხადებაში, ჯო ბაიდენმა აღნიშნა, რომ ეს ნაბიჯი პარტიისა და ქვეყნის საუკეთესო ინტერესების გათვალისწინებით გადადგა. ბაიდენმა მხარი დაუჭირა კამალა ჰარისის „დემოკრატიული“ პარტიის საპრეზიდენტო კანდიდატად წარდგენას.