პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, რატი იონათამიშვილის განცხადებით, საზოგადოებას არ გაუკვირდება, თუკი ბიძინა ივანიშვილის მკვლელობის მომზადებისა და სახელმწიფოს წინააღმდეგ შეთქმულების საქმეზე უსაფრთხოების სამსახურში მიმდინარე გამოძიების კვალი საქართველოს ყოფილ მაღალჩინოსნებამდე მივა.
როგორც მან გადაცემა „დღის ქრონიკაში“ საუბრისას აღნიშნა, მიხეილ სააკაშვილის შემოპარვის საქმეზე ჩვენ ვნახეთ ძალიან მყარი მტკიცებულებები ვისთან მიდიოდა კვალი და ეს სწორედ ხელისუფლების ყოფილი მაღალჩინოსნები იყვნენ.
„სწორედ ისინი აორგანიზებდნენ იმას, რომ სააკაშვილის შემოსვლით აქ სწორედ სისხლისღვრა და არეულობა მომხდარიყო. ამიტომ, მათთვისაც სააკაშვილი ინსტრუმენტი და საშუალება იყო, როდესაც საქართველოში აგზავნიდნენ. ეს იყო ძალიან საინტერესო ამ ფაქტში. ამიტომ, ეს ადამიანები, რა თქმა უნდა, როგორც იყვნენ ისე არიან საქართველოს მტრები და საქართველოს მტრული საქმიანობით იყვნენ მუდამ დაკავებულები, მაშინაც, როდესაც ხელისუფლებაში იყვნენ და ახლაც, როდესაც ნაწილი ოპოზიციაშია და ნაწილი გაქცეულია საქართველოდან. ისინი მაინც იმაზე ფიქრობენ, როგორ დააზარალონ და როგორ გააშავონ ჩვენი ქვეყანა და ამაზე ხარჯავენ ყველაფერს. ცალკე საკითხია როგორ შეიძლება ეს ქვეყანა, სადაც დაიბადე და გაზარდე ასე გძულდეს, მაგრამ ეს ადამიანები რომ ამ სიძულვილში გამორჩეულები არიან, მგონი ამას თითოეული მოქალაქე ხედავს“, – განმარტა რატი იონათამიშვილმა.