საპარლამენტო უმრავლესობის ერთ-ერთი ლიდერი გია ვოლსკი პრეზიდენტის ქალიშვილის, ანა მარგველაშვილის მიერ გაკეთებულ განცხადებებს ეხმაურება.
”ეს ძალიან პრიმიტიულია – თუ პოლიტიკური ოპონენტი გებრძვის და მის შვილს ან ახლობელს რაიმეს ჩაუდებ, დამიჯერეთ, ის პოლიტიკური ოპონენტი კიდევ ერთი ათად გაძლიერდება. მე გარწმუნებთ – ეს ასე არ ხდება. თუ ხელისუფალი ამაზე წამსვლელია, მაშინ მისი რაციონალურობის საკითხი დგება. როდესაც ”ნაციონალური მოძრაობა” ამას აკეთებდა, ანადგურებდა თავისი მოწინააღმდეგეების მთელ სპექტრს, მათ შორის ჯანმრთელობის მოშლის მეშვეობით. მაშინ ეს იყო პოლიტიკური ნება, ეს იყო პოლიტიკური დამოკიდებულება ოპონენტისადმი და ეს იყო სტრატეგია. ხელისუფლებას ასეთი პოლიტიკური ნება რომ ჰქონდეს, ძალიან სულელური სტრატეგია იქნებოდა, რომ ადამიანი, რომელიც გებრძვის მთელი ძალებით, ყველანაირი მეთოდით კიდევ უფრო მეტი შანსი და რესურსი მისცე, რომ ეს ბრძოლა უფრო ინტენსიური გახადო. გამწარების მცდელობა ბავშვურია”, – განაცხადა გია ვოლსკიმ.
კითხვაზე, რატომ მიიჩნევს ანა მარგველაშვილი, რომ მის ახლობლებზე ზეწოლა მიმდინარეობს, ვოლსკიმ აღნიშნა, რომ ეს თავად ”პრეზიდენტის ქალიშვილს უნდა ვკითხოთ”.
ვოლსკის განცხადებით, არაადეკვატური იქნებოდა ვინმე თვლიდეს, რომ შეიძლება ანა მარგველაშვილის ახლობლებზე ზეწოლამ პოლიტიკური ვითარება შეცვალოს.
”უნდა ჰკითხოთ, რატომ თვლის ასე. ის, რომ პრეზიდენტის ინსტიტუტი და პარლამენტის ინსტიტუტი პერმანენტული კამათის რეჟიმში გადავიდა და ის, რომ შვილის ახლობელი დააკავეს ნარკოტიკების ბრალდებით, ერთმანეთთან კავშირში არ არის. ეს მოცემულობა არსებობს, ეს კამათი არსებობს და ანა მარგველაშვილის ახლობელი ამ თემასთან არანაირ კავშირში არ არის”, – აღნიშნა დეპუტატმა.
ანა მარგველაშვილის მეგობარი რამდენიმე დღის წინ ნარკოტიკების შენახვის ბრალდებით დააკავეს.