გერმანიის მთავრობა ქვეყნის შიგნით მზარდი ზეწოლის ქვეშ აღმოჩნდა, რათა შეამციროს უკრაინისადმი მხარდაჭერა და უფრო აქტიურად მოითხოვოს მოლაპარაკებები ომის დასასრულებლად, – წერს ამერიკული გაზეთი The New York Times-ი.
საბიუჯეტო უთანხმოებისა და მზარდი მტკიცებულებების ფონზე, რომ უკრაინა რუსეთსა და გერმანიას შორის გაზსადენის აფეთქების უკან დგას, კანცლერი ოლაფ შოლცი ცდილობს გაფანტოს ეჭვები, რომ ბერლინი უკრაინის დახმარებას შეამცირებს.
ოთხშაბათს მოლდოვაში სიტყვით გამოსვლისას შოლცმა აღნიშნა, რომ „გერმანია არ შეწყვეტს უკრაინის მხარდაჭერას“ და დარჩება, მისი თქმით, „უკრაინის ყველაზე დიდ მხარდამჭერად ევროპაში“.
თუმცა შოლცის სამპარტიული კოალიციური მთავრობა სულ უფრო არაპოპულარული ხდება და სექტემბერში მნიშვნელოვანი ადგილობრივი არჩევნების წინაშე დგას, სადაც, როგორც უკიდურესი მემარცხენე, ასევე უკიდურესი მემარჯვენე პარტიები, რომლებიც კიევისთვის სამხედრო დახმარების შეწყვეტას ითხოვენ, მოსალოდნელია, რომ კარგ შედეგს აჩვენებენ.
გერმანიის მთავრობისთვის მთავარი ტვირთი კონსტიტუციური მოთხოვნაა, რომ ახალი საბიუჯეტო დავალიანება მშპ-ს 0.35 პროცენტს არ აღემატებოდეს.
მაგრამ გერმანიის მთავრობა ასევე შეიძლება აღმოჩნდეს რთულ მდგომარეობაში, თუ გენერალური პროკურორი უკრაინელ ოფიციალურ პირებს დაადანაშაულებს 2022 წელს რუსეთსა და გერმანიას შორის არსებული ჩრდილოეთის ნაკადის ოთხი გაზსადენის აფეთქებაში.
დაძაბულობა უკრაინის კონტექსტში უფრო კონკრეტულად 2025 წლის ბიუჯეტს ეხება. ფინანსთა მინისტრს, კრისტიან ლინდნერს სურს, თავიდან აიცილოს გადასახადების გაზრდა და ბიუჯეტის შემცირება.