საფრანგეთის პრეზიდენტმა, ემანუელ მაკრონმა განაცხადა, რომ არ იცოდა Telegram-ის აღმასრულებელი დირექტორის, პაველ დუროვის საფრანგეთში ჩასვლის შესახებ. ინფორმაციას ამის შესახებ სააგენტო Reuters-ი ავრცელებს.
„მე აბსოლუტურად არ ვიცოდი დუროვის საფრანგეთში ჩამოსვლის შესახებ და ეს სავსებით ნორმალურია, რადგან არ ვიცი მთელი მსოფლიოდან მოქალაქეების ჩამოსვლისა და წასვლის შესახებ, აქვთ თუ არა მათ საფრანგეთის მოქალაქეობა“, – აღნიშნა ემანუელ მაკრონმა.
26 აგვისტოს, მაკრონმა განაცხადა, რომ დუროვის დაკავება საფრანგეთის ტერიტორიაზე მიმდინარე სასამართლო გამოძიების ფარგლებში მოხდა და „ეს არანაირად არ არის პოლიტიკური გადაწყვეტილება“.
პაველ დუროვი სასამართლო ზედამხედველობის ქვეშ მოექცა და მას საფრანგეთის დატოვება აეკრძალა.
„დუროვი დაექვემდებარა სასამართლო ზედამხედველობას, კერძოდ, ხუთი მილიონი ევროს ოდენობის გირაოს გადახდის მოთხოვნით. ის ასევე უნდა გამოცხადდეს პოლიციის განყოფილებაში კვირაში ორჯერ და მას ეკრძალება საფრანგეთის ტერიტორიის დატოვება“, – განაცხადეს პარიზის პროკურატურაში.
მილიარდერი დუროვი საფრანგეთის სპეცსამსახურებმა ლე ბურჟეს აეროპორტში დააკავეს. ის საფრანგეთში აზერბაიჯანიდან ჩაფრინდა.
ოთხშაბათს, ფრანგმა მოსამართლემ დუროვის მიმართ ოფიციალური გამოძიება დაიწყო. ის ეჭვმიტანილია თანამონაწილეობაში – კერძოდ. ონლაინ პლატფორმის მართვა, რომელიც უშვებს უკანონო ტრანზაქციებს, ბავშვებზე სექსუალური ძალადობის ამსახველი სურათების გამოქვეყნებას, ნარკოტიკებით ვაჭრობასა და თაღლითობას.
პაველ დუროვმა რუსეთი 2014 წელს დატოვა. საფრანგეთის მოქალაქეობა მან 2021 წელს მიიღო.