აშშ-ის ჯორჯიის შტატში კოლტ გრეის სასამართლო პროცესი დაიწყო, რომელსაც ბრალად ერთ-ერთ სკოლაში სროლის შედეგად ოთხი ადამიანის მკვლელობა ედება. ინფორმაციას Reuters-ი ავრცელებს.
მოსამართლე ქული მინგელდორფმა 14 წლის მოზარდს აუხსნა, რომ მას დამამძიმებელ გარემოებებში ჩადენილი მკვლელობის ოთხ ეპიზოდს ედავებიან, და თუ მისი ბრალეულობა დამტკიცდება, მას სიკვდილით დასჯიან.
სააგენტოს ცნობით, საბრალდებო დასკვნის მოსმენისას ბრალდებული ხელბორკილებში ჩუმად იჯდა და მხოლოდ თავის ქნევით პასუხობდა მოსამართლის შეკითხვებს.
როგორც Reuters-ი აღნიშნავს, საქმის ფარგლებში დაკავებულია ბოროტმოქმედის მამაც, 54 წლის კოლინ გრეი. მას ბრალად არაგანზრახ მკვლელობა და ბავშვებთან არასათანადო მოპყრობა ედება. ივარაუდება, რომ კოლინ გრეი სასამართლოს წინაშე მოგვიანებით წარდგება.
კოლტ გრეიმ სკოლაში სროლა 5 სექტემბერს მოაწყო. სროლის შედეგად ოთხი ადამიანი დაიღუპა, ხოლო ცხრა დაშავდა. გავრცელებული ინფორმაციით, სროლას სკოლის ორი მოსწავლე და ორი მასწავლებელი ემსხვერპლა.