აშშ-ის სახელმწიფო მდივანმა ენტონი ბლინკენმა განაცხადა, რომ რუსეთმა უკვე მიიღო ირანის მიერ მიწოდებული ბალისტიკური რაკეტების პარტია.
„რუსეთმა ამ ბალისტიკური რაკეტების პარტია უკვე მიიღო, და, როგორც ჩანს, რამდენიმე კვირაში მათ უკრაინაში უკრაინის წინააღმდეგ გამოიყენებს“, – თქვა ბლინკენმა.
როგორც ამერიკის სახელმწიფო მდივანმა აღნიშნა, ასეთი ცნობები მას დაზვერვამ მიაწოდა. ამერიკელებმა უკვე გაუზიარეს ინფორმაცია პარტნიორებს. ბლინკენი ფიქრობს, რომ რუსეთსა და ირანს შორის მზარდი თანამშრომლობა ევროპის უსაფრთხოებას უქმნის საფრთხეს.
როგორც ბლინკენმა თქვა, ბალისტიკური რაკეტების მიწოდების გამო აშშ ავიაკომპანია Iran Air-ს სანქციებს დაუწესებს. მისი თქმით, სხვა ქვეყნებიც ირანისთვის სანქციების შემოღებისთვის ემზადებიან.
ამერიკულმა გამოცემა The Wall Street Journal-მა 6 სექტემბერს გაავრცელა ინფორმაცია, რომლის თანახმად, ირანმა რუსეთს მცირე რადიუსზე მოქმედი ბალისტიკური რაკეტები გაუგზავნა. ოფიციალური თეირანი უარყოფს ამ ცნობებს.