საქართველოში ავსტრიის საელჩო სოციალურ ქსელში ეროვნული საფეხბურთო ნაკრების ალბანეთთან გამარჯვებას ეხმაურება და გულშემატკივარს გამარჯვებას ულოცავს. საელჩო განსაკუთრებით ხაზს უსვამს ოთარ კიტეიშვილის შთამბეჭდავ თამაშს, რომელიც ავსტრიული „შტურმის“ ნახევარმცველიცაა.
„ვულოცავთ საქართველოს ნაკრებს და ყველას მის გულშემატკივარს ერთა ლიგის ფარგლებში ზედიზედ მეორე ბრწყინვალე გამარჯვებას. განსაკუთრებით ვამაყობთ ოთარ კიტეიშვილით – ავსტრიის ეროვნული ჩემპიონი კლუბის, გრაცის „შტურმის“ ქართველი ჯადოქარი ნახევარმცველით და 2023-2024 წლების სეზონის ავსტრიის ბუნდესლიგის საუკეთესო ფეხბურთელით, რომელმაც საქართველოს ნაკრებთან ერთად შთამბეჭდავი თამაში აჩვენა. წარმატებები სამომავლო შეხვედრებში“, – აღნიშნულია საელჩოს განცხადებაში.
საქართველოს ეროვნულმა ნაკრებმა ერთა ლიგის გათამაშებაში მეორე გამარჯვება მოიპოვა. ჩეხეთთან გამარჯვების შემდეგ, ვილი სანიოლის გუნდმა ალბანეთის ნაკრებს ტირანაში 1:0 სძლია.
ორი ტურის შემდეგ საქართველოს ნაკრები ერთა ლიგის B1 ჯგუფს 6 ქულით, ერთპიროვნულად ლიდერობს. მომდევნო მატჩებს ჩვენი გუნდი ოქტომბერში, უკრაინის და ალბანეთის წინააღმდეგ გამართავს.