ცხრა ევროპულმა ქვეყანამ გამოთქვა პროტესტი საერთაშორისო სავალუტო ფონდის (სსფ) მიმართ, რადგან მან რუსეთში მისიების განახლება გადაწყვიტა. ინფორმაციას Reuters-ი ავრცელებს.
ისინი ამტკიცებდნენ, რომ რუსეთთან ხელახალი ურთიერთობა, ზიანს მიაყენებს საერთაშორისო სავალუტო ფონდის რეპუტაციას.
2022 წლის თებერვალში მოსკოვის უკრაინაში შეჭრის შემდეგ, საერთაშორისო სავალუტო ფონდმა შეწყვიტა ყოველწლიური კონსულტაციები რუსეთთან.
2 სექტემბერს საერთაშორისო სავალუტო ფონდის რუსმა აღმასრულებელმა დირექტორმა ალექსეი მოჟინმა გამოაცხადა, რომ საერთაშორისო სავალუტო ფონდი განაახლებს ონლაინ კონსულტაციებს რუსეთთან 16 სექტემბერს, რასაც 1 ოქტომბრამდე სსფ-ის დელეგაციის ვიზიტი მოსკოვში მოჰყვება რუს ოფიციალურ პირებთან შეხვედრებისთვის.
„გვსურს გამოვხატოთ ჩვენი ძლიერი უკმაყოფილება საერთაშორისო სავალუტო ფონდის ამგვარი გეგმების მიმართ“, – აცხადებენ ლიეტუვის, ლატვიის, ესტონეთის, ფინეთის, შვედეთის, ისლანდიის, დანიის, ნორვეგიისა და პოლონეთის ფინანსთა მინისტრები სსფ-ის ხელმძღვანელის კრისტალინა გეორგიევასადმი მიწერილ წერილში.