რუსეთის უშიშროების საბჭოს მოადგილე დიმიტრი მედვედევი აცხადებს, რომ თუ „მოთმინება ამოიწურება“, რუსეთი ბირთვულ იარაღს გამოიყენებს. ამის შესახებ მან „ტელეგრამის“ არხზე დაწერა.
მედვედევის თქმით, რუსეთი არ იყენებს ბირთვულ იარაღს მოწინააღმდეგის შეტევებზე საპასუხოდ, რადგანაც აცნობიერებს ასეთი კონფლიქტის საფრთხესა და შეუქცევადობას. მედვედევის განცხადებით, ჯერჯერობით მოსკოვი მოთმინებას იჩენს, თუმცა ის შეიძლება ამოიწუროს.
„რას ფიქრობენ დასავლელი უფროსები და მათი ომში გართული პოლიტიკური ისტებლიშმენტი ჩვენი ქვეყნის რეაქციაზე „ტერიტორიის სიღრმეში“ შესაძლო სარაკეტო დარტყმებზე? აი, რას: რუსები ბევრს საუბრობენ მასობრივი განადგურების იარაღით პასუხის შესახებ, მაგრამ არაფერს აკეთებენ. ეს მხოლოდ „სიტყვიერი ინტერვენციებია“. რუსები ზღვარს არ გადაკვეთენ. ისინი უბრალოდ გვაშინებენ. ბირთვული კონფლიქტი მათთვის არაფრის მომცემია, მათ შეიძლება უფრო მეტი დაკარგონ, მათ შორის, გლობალური სამხრეთის მხარდაჭერა. და საერთოდ, ვის სჭირდება აპოკალიფსი? და ა.შ.“ – წერს მედვედევი.
მედვედევმა აღნიშნა, რომ ბირთვული კონფლიქტი მართლაც არავის სჭირდება.
„სწორედ ამიტომ ჯერჯერობით არ მიღებულა გადაწყვეტილება ბირთვული იარაღის გამოყენების შესახებ (არასტრატეგიული ან, მით უმეტეს, სტრატეგიული). რუსეთი მოთმინებას იჩენს, რადგან, ცხადია, ბირთვული პასუხი უკიდურესად რთული გადაწყვეტილებაა შეუქცევადი შედეგებით. თუმცა გაბღენძილ ანგლო-საქს კაცუნებს არ სურთ ერთი რამის აღიარება: ნებისმიერ მოთმინებას აქვს დასასრული“, – წერს მედვედევი სოციალურ ქსელში.