უკრაინის ზოგიერთი მოკავშირე განხილვას იწყებს, თუ როგორ შეიძლება დასრულდეს ბრძოლა რუსეთის შეჭრის წინააღმდეგ, რაც იწვევს შიშს დასავლეთის ზოგიერთ სხვა დედაქალაქში, რომ ამ ძალისხმევამ შეიძლება აიძულოს კიევი ნაადრევად წავიდეს ცეცხლის შეწყვეტაზე. ინფორმაციას ამის შესახებ სააგენტო Bloomberg-ი ავრცელებს.
გამოცემის წყაროების ცნობით, მომავალი წლის სტრატეგიის შესახებ დისკუსიების ფარგლებში, ოფიციალური პირები სულ უფრო სერიოზულად განიხილავენ ომის დასრულებას მოლაპარაკებების გზით.
გამოცემის თანამოსაუბრეებმა დაადასტურეს, რომ მოლაპარაკებებზე გადაწყვეტილებას კიევი მიიღებს და ვოლოდიმირ ზელენსკიზე ზეწოლას არავინ ახორციელებს.
„მაშინ, როდესაც ომი ზამთარს უახლოვდება, ბრძოლის ველზე გარღვევის ნიშნები არ ჩანს. ეს [უკრაინის] მოკავშირე ქვეყნების ზოგიერთ ოფიციალურ პირს უბიძგებს, დაიწყონ დიპლომატიის მეშვეობით ჩიხიდან გამოსვლის გზების ძიება“, – ნათქვამია სტატიაში.
სააგენტო Bloomberg-ი აღნიშნავს, რომ რუსეთს ბრძოლის ველზე წინსვლა უჭირს, მაგრამ მისმა რაკეტებმა გაანადგურეს უკრაინის ენერგეტიკული ინფრასტრუქტურის დიდი ნაწილი – ეს კი იწვევს შეშფოთებას იმის თაობაზე, თუ როგორ გადაიტანს ქვეყანა ამ ზამთარს.
„მოლაპარაკებებმა საბრძოლო მოქმედებების შეწყვეტის თაობაზე უნდა გადაწყვიტოს საკვანძო საკითხი: როგორ უზრუნველყონ, რომ უკრაინა არ გახდეს დაუცველი რუსეთის მომავალი თავდასხმის მიმართ. ამავდროულად, [უნდა] დაარწმუნოს მოკავშირეები, რომ ისინი არ იქნებიან ჩათრეულნი კრემლთან პირდაპირ კონფლიქტში“, – ნათქვამია სტატიაში.