შესანიშნავი თამაში იყო, წარსულში დავბრუნდით, – „მილანისა“ და საქართველოს ნაკრების ვეტერანმა ფეხბურთელებმა მიხეილ მესხის სტადიონზე გამართული მატჩი შეაფასეს.
„ეს არის ერთმანეთთან შეხვედრის და ასევე ხალხთან ერთად ზეიმის საშუალება. ძალიან ლამაზი ქალაქია, სტადიონზეც ლამაზი ატმოსფერო იყო, რადგან როდესაც ყოფილი ფეხბურთელების სანახავად ამდენი ხალხი მოდის, ჩვენთვისაც ძალიან სასიამოვნოა“, – განაცხადა „მილანის“ ვეტერანმა ფეხბურთელმა კრისტიან ბროკიმ.
როგორც საქართველოს ლეგენდების ნაკრების მთავარმა მწვრთნელმა, თემურ ქეცბაიამ განაცხადა, ასეთი თამაშები სწორედ ფეხბურთის პოპულარიზაციისთვის არის მნიშვნელოვანი.
„მეტი ასეთი თამაში ფეხბურთის პოპულარიზაციისთვის არის საჭირო, მითუმეტეს იმ დროს, როდესაც ფეხბურთის ბუმია საქართველოში“, – განაცხადა ქეცბაიამ.
თამაში შეაფასა ფეხბურთის ფედერაციის პრეზიდენტმა, ვეტერანმა ფეხბურთელმა ლევან კობიაშვილმაც.
„საშუალება მოგვეცა, რომ ეროვნული ნაკრების მაისური ჩაგვეცვა, რაც ძალიან დიდი პატივი და ბედნიერებაა. ბედნიერი დღე იყო, ვისიამოვნეთ“, – თქვა კობიაშვილმა.