ყველა კარგად ხედავს, თუ რამდენს აკეთებს „ქართული ოცნება“ იმ მოქალაქეებისთვის, რომლებიც ევროპაში არიან, -განაცხადა „ქრონიკასთან“ უმრავლესობის დეპუტატმა სოზარ სუბარმა ბარსელონაში „ქართული ოცნების“ მხარდამჭერი კლუბის გახსნის შესახებ კომენტირებისას.
„ყველა ის ადამიანი, რომელიც აქ [მხარდამჭერი კლუბის გახსნაზე] არის მოსული, მხარს უჭერს საქართველოს, „ქართულ ოცნებას“ და „ქართული ოცნების“ სამშვიდობო პოლიტიკას. ამაზე მნიშვნელოვანი რომ არაფერია, მათ [ამომრჩეველმა] ყველაზე კარგად იციან. წეღან ვსაუბრობდით და ყველა საუბრობს იმ უბედურებაზე, რაც დღეს ჩვენს მეგობარ უკრაინაში ხდება, იმ ტრაგედიაზე, რომელშიც ვერავინ ეხმარება უკრაინას და ფაქტობრივად მიტოვებულია ბედის ანაბარა. ყველა ხედავს, რომ იგივე ბედის გაზიარებისკენ მიათრევენ საქართველოს გარკვეული ძალები, ქართული ოპოზიცია და ამის თავიდან აცილებაზე დიდი საქმე საქართველოს დღეს არ აქვს. ამიტომაც უჭერენ მხარს სამშვიდობო პოლიტიკას.
ყველა კარგად ხედავს, თუ რამდენს აკეთებს „ქართული ოცნება“ იმ მოქალაქეებისთვის, რომლებიც ევროპაში არიან, დაწყებული ზოგადი პოლიტიკიდან, როგორიც არის უვიზო მიმოსვლა, თავისუფალი ვაჭრობის შეთანხმება, რაც თითოეული მათგანისთვის ძალიან მნიშვნელოვანია და დამთავრებული ისეთი საკითხებით, როგორიც არის, ღმერთმა დიდხანს აცოცხლოს ყველა, მაგრამ თუ ვინმეს რაიმე გაუჭირდა, გარდაცვალების, ან ავადმყოფობის შემთხვევაში რასაც აკეთებს ქართული სახელმწიფო“, – აღნიშნა სუბარმა.