ანგარიში არის აბსოლუტურად ამოვარდნილი კონტექსტიდან და არის უზუსტობებით გაჯერებული, – განაცხადა საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა ევროკომისიის გაფართოების ანგარიშზე საუბრისას.
დეპუტატი ორმაგ სტანდარტზეც მიუთითებს, რადგან, მაგალითად გამჭვირვალობის შესახებ კანონის გაუქმებას საქართველოში ითხოვენ, თუმცა არა – საფრანგეთში.
„წარმოადგენს იმ მოთხოვნების შემცველ დოკუმენტს, რომლის მიმართაც ქართველ ხალხს მკაფიო პოზიცია აქვს გამოხატული. ჩვენ ვერ ვხედავთ ევროკავშირის მოთხოვნას მაგალითად საფრანგეთთან მიმართებით, რომ გააუქმოს გამჭვირვალობის კანონი. ითხოვენ საქართველოსგან კანონების გაუქმებას, რაც კიდევ უფრო ამსგავსებს ევროკავშირს საბჭოთა კავშირს“, – აღნიშნა მათიკაშვილმა.
ევროკომისიის მიერ მომზადებულ, 2026 წლის გაფართოების ანგარიშთან დაკავშირებით განცხადება გაავრცელა საქართველოს საგარეო საქმეთა სამინისტრომ.
„შემაშფოთებელია, რომ ფაქტობრივი უზუსტობებით და მცდარი შეფასებებით ევროკომისიის ანგარიში ხელს უწყობს ანტიქართული ნარატივების გამყარებას, რაც თავის მხრივ ამცირებს საქართველოსთან ევროკავშირის კონსტრუქციული ჩართულობისა და დიალოგის სივრცეს“, – ნათქვამია სამინისტროს განცხადებაში.
საქართველოს საგარეო უწყება ასევე, აცხადებს, რომ „მიუხედავად იმისა, რომ გაფართოების ანგარიში საქართველოსთან დაკავშირებით მეტწილად ტენდენციური შეფასებების გასაჟღერებლად და პოლიტიკური სპეკულაციების გასამტკიცებლად არის გამოყენებული, ქართული მხარე დეტალურად შეისწავლის ევროკომისიის ანგარიშს და დასაბუთებულ კომენტარებს წარუდგენს ევროკომისიას“.
ევროკომისიის ანგარიშის თანახმად, საქართველოში ძალადობრივ აქციებზე დაკავებული ადამიანები „თვითნებურად დაკავებულებად“ არიან მოხსენიებული.