რუსეთში შვილების გარეშე ცხოვრების პროპაგანდის აკრძალვა სურთ. ახალი კანონი პარლამენტმა ხუთშაბათს პირველი მოსმენით მიიღო. ამ იდეის ინტერნეტით, მედიით თუ რეკლამის საშუალებით გავრცელებისთვის, დიდი ჯარიმები დაწესდება. ეს ნაბიჯი არის კიდევ ერთი მცდელობა, რომლითაც ხელისუფლებას შობადობის შემცირების ტენდენციის შეცვლა სურს.
რუსმა დეპუტატებმა ერთხმად მოიწონეს კანონპროექტი, რომელიც მეორე და მესამე მოსმენით ჯერ არ არის მიღებული. „როიტერის“ ცნობით, უშვილოდ ცხოვრების წამახალისებელი მასალების გამოქვეყნება ინტერნეტში ან მედიაში – მათ შორის რეკლამა, რომელიც შვილების გარეშე ცხოვრებას მიმზიდველად წარმოაჩენს, – უკანონოდ ცხადდება და ჯარიმით ისჯება. სააგენტო „ფრანს პრესის“ ინფორმაციით, ახალი კანონის დარღვევისთვის ფიზიკურ პირებს ემუქრებათ ჯარიმა 400 000 რუბლის ოდენობით, თანამდებობის პირებს – ორჯერ მეტი, ხოლო იურიდიულ პირებს – ხუთ მილიონ რუბლამდე.
წელს რუსეთში ბოლო მეოთხედი საუკუნის განმავლობაში ყველაზე დაბალი შობადობა დაფიქსირდა. ამის მთავარ მიზეზად რუსმა პოლიტიკოსებმა მოძრაობა „ადამიანი შვილების გარეშე“ დაასახელეს. თუმცა, ასეთი ცხოვრების უპირატესობებზე რუსეთში ცოტა ადამიანი თუ გამოთქვამს თავის აზრს, ისინიც – ძირითადად, სოციალურ ქსელებში. ქვეყანაში არ არსებობს ოფიციალური კლუბები ან ასოციაციები, რომლებიც ამ იდეის საჯაროდ პოპულარიზაციას მოახდენენ.
თუმცა, ქვეყნის ხელმძღვანელობას ეს ფაქტი არ აინტერესებს. „უშვილობის წამახალისებელი მოძრაობა კანონით უნდა აიკრძალოს, ის, უბრალოდ, უნდა გაქრეს. მან ყოველგვარი აქტუალობა დაკარგა და ქალთა თანამედროვე მოლოდინებს არ აკმაყოფილებს“, – ამბობს რუსეთის ფედერაციის საბჭოს თავმჯდომარე, ვალენტინა მატვიენკო.
„ეს ავადმყოფობაა“
„ეს ავადმყოფობაა. ეს არის დაავადების გამოვლენა. ნებისმიერი დაავადება კი უნდა განიკურნოს, რათა სხვები არ დაინფიცირდნენ“, – აცხადებს რუსეთის მართლმადიდებლური ეკლესიის ტელეარხის გენერალური დირექტორი, ბორის კორჩევნიკოვი. ის არა მხოლოდ უშვილო ქალების ცხოვრების წესის წახალისებას ეწინააღმდეგება, არამედ აბორტის წინააღმდეგაც გამოდის. კორჩევნიკოვი მოითხოვს, რომ რუსეთში ქალებმა ამისთვის თანხა გადაიხადონ. დღეისთვის ქვეყანაში აბორტის ხარჯები მთლიანად ჯანმრთელობის დაზღვევით იფარება.
რუსეთის ქალთა არასამთავრობო ორგანიზაციების კონსორციუმის წარმომადგენელი, სოფია რუსოვა, ხუთ წელზე მეტია, ქალთა უფლებებს იცავს. ის დარწმუნებულია, რომ არც ფასიანი აბორტები და არც უშვილოდ ცხოვრების წახალისების აკრძლვა შობადობის ზრდას არ გამოიწვევს. „წლებია, სხვადასხვა სოციალური ფენიდან გამოსულ ქალებთან ვმუშაობთ. გადაწყვეტილება ბავშვის არგაჩენის შესახებ, ძირითადად, მატერიალურ გაჭირვებასა და ეკონომიკურ პრობლემებს უკავშირდება. დეპუტატები ამ მიზეზებს არ ეძებენ“, – აღნიშნა მან.