ეს არის შიდა ინსტრუქცია პოლიციელებისთვის, რომელიც მინისტრის მხრიდან არის დამტკიცებული, – განაცხადა შს მინისტრის მოადგილე ალექსანდრე დარახველიძემ, რომელმაც „დღის ქრონიკასთან“ საუბრისას, საპროტესტო აქციებზე საპოლიციო მუშაობის წესები განმარტა.
მისი თქმით, ზოგიერთი არასამთავრობო ორგანიზაციის და რადიკალური ოპოზიციის წევრების მხრიდან, ხდება აპელირება, რიგ შემთხვევებში, პოლიციელების მხრიდან ცრემლსადენი გაზის და წყლის ჭავლის გამოყენებასთან დაკავშირებით. ალექსანდრე დარახველიძე განმარტავს, რომ მშვიდობიანი შეკრება -მანიფესტაციის უფლება კანონით არის დაცული, მაგრამ თუ კი ის გასცდა კანონით განსაზღვრულ ფარგლებს და გახდა ძალადობრივი ხასიათის, პოლიციას აქვს უფლება გამოიყენოს ძალა და სპეციალური საშუალებები და ეს ყველაფერი გაწერილია პოლიციის შესახებ კანონში.
მისივე განცხადებით, საპოლიციო ღონისძიებების შესახებ დადგენილი წესის შესახებ ინფორმაცია აქვთ მათ შორის იმ არასამთავრობო ორგანიზაციებსაც, რომლებიც თემით სპეკულირებენ.
„აქ არაფერი განსაკუთრებული არ წერია. ეს არის ჩვეულებრივი საპოლიციო ღონისძიება, რომელსაც ნებისმიერი ევროპული ქვეყნის პოლიცია იყენებს. ამას ვიყენებთ მხოლოდ იმ შემთხვევაში როდესაც შეკრება-მანიფესტაცია გასცდება მშვიდობიანი შეკრების ფარგლებს და ხდება ძალადობრივი.
არაერთი განცხადება გინახავთ შინაგან საქმეთა სამინისტროს, როდესაც მოვუწოდებთ მოქალაქეებს სიმშვიდისკენ, მოვიწოდებთ, რომ კანონით დადგენილ ფორმებში გამოხატონ პროტესტი და როდესაც იწყება სპეციალური დანიშნულების რაზმების მხრიდან აქციის მონაწილეების კონკრეტული ტერიტორიის დატოვების უზრუნველყოფა, ხმამაღლა მოლაპარაკეთი მუდმივად ხდება გამოცხადება, რომ დაემორჩილონ პოლიციის კანონიერ მოთხოვნას და დატოვონ ტერიტორია. ეს არის სტანდარტული ღონისძიება და გამოვიყენებთ მხოლოდ უკიდურეს შემთხვევებში“, – განაცხადა ალექსანდრე დარახველიძემ.