კონკრეტული აქციის დროს დგება შესაბამისი სამოქმედო გეგმა, რომელიც არის საიდუმლო ტიპის დოკუმენტი, ვინაიდან შეიცავს იმგვარი ხასიათის ინფორმაციას, რომლის გამჟღავნებამ შეიძლება საფრთხის ქვეშ დააყენოს თავად პოლიციელების უსაფრთხოება და სამოქმედო გეგმის განხორციელება, – განაცხადა „დღის ქრონიკაში“ შინაგან საქმეთა მინისტრის მოადგილემ, ალექსანდრე დარახველიძემ.
„დოკუმენტში გაწერილია კონკრეტული დანაყოფის რაოდენობა, მათი მოქმედებისარეალი, საკომუნიკაციო საშუალებები და სხვადასხვა ისეთი გადაწყვეტილება, რომელიც არ უნდა იყოს ღია ინფორმაცია, რადგან აზრს დაკარგავდა ასეთი გეგმის შემუშავება“, – აღნიშნა მინისტრის მოადგილემ.
ალექსანდრე დარახველიძემ საპროტესტო აქციებზე საპოლიციო მუშაობის წესები განმარტა და აღნიშნა, რომ ეს არის შიდა ინსტრუქცია პოლიციელებისთვის, რომელიც მინისტრის მხრიდან არის დამტკიცებული.
მისივე თქმით, მშვიდობიანი შეკრება -მანიფესტაციის უფლება კანონით არის დაცული, მაგრამ თუ კი ის გასცდა კანონით განსაზღვრულ ფარგლებს და გახდა ძალადობრივი ხასიათის, პოლიციას აქვს უფლება გამოიყენოს ძალა და სპეციალური საშუალებები და ეს ყველაფერი გაწერილია პოლიციის შესახებ კანონში.