მინდა გულწრფელი იმედი გამოვხატო, რომ გუშინ არჩეული ხელმძღვანელობა ეფექტიანად გაუმკლავდება ძირითად გამოწვევებს, რომელიც ამ ქვეყნის წინაშე დგას და იმედი გვაქვს, რომ საქართველოს უფრო ახლოს მიიყვანს იმ მიზნებთან, რაც უკავშირდება ევროკავშირში გაწევრიანებას, – განაცხადა ეუთოს სადამკვირვებლო მისიის სპეციალურმა კოორდინატორმა პასკალ ალიზარდმა პრესკონფერენციაზე.
მან საქართველოში გუშინ ჩატარებული არჩევნები შეაფასა და საქართველოს მთავრობას თანამშრომლობისთვის მადლობა გადაუხადა.
„მინდა მადლობა გადავუხადო საქართველოს ხელისუფლებას თანამშრომლობისთვის ამ მისიის განმავლობაში და ასევე, გულთბილი მადლობა გადავუხადო ქართველ ხალხს“, – აღნიშნა ალიზარდმა.
მისივე თქმით, არჩევნები იყო კარგად ადმინისტრირებული და „უნდა აღინიშნოს, რომ საკმაოდ აქტიურად ხორციელდებოდა ამომრჩევლების განათლება და ინფორმირება ახალი ტექნოლოგიების გამოყენების შესახებ“.
ეუთოს წარმომადგენლის შეფასებით, კენჭისყრის დღეს ამომრჩეველთა აქტივობა ძალიან მაღალი იყო. ასევე, პარტიების დამკვირვებლებიც აქტიურად იყვნენ წარმოდგენილნი, რაც არის ნიშანი იმისა, რომ ეს სისტემა იზრდება, ვითარდება და დემოკრატია ნამდვილად არის განვითარების პროცესში.
მან ასევე ისაუბრა პოლიტიკური გარემოს პოლარიზების საკითხზე, თუმცა, აღნიშნა, რომ ამომრჩეველს ფართო არჩევანის საშუალება ჰქონდა. „მიუხედავად იმისა, რომ პოლარიზება რჩება პოლიტიკურ სცენაზე საკმაოდ მნიშვნელოვან საკითხად, ჩვენ როგორც დავაკვირდით მთელი მისიის განმავლობაში, ამომრჩევლებს საკმაოდ დიდი არჩევანის გაკეთება შეეძლოთ, რადგან საკმაოდ მრავალფეროვანი იყო ეს პოლიტიკური ხმები. მედიაგარემო ზუსტად ასახავდა ამ ღრმა პოლარიზებას”, – აღნიშნა მისიის სპეციალურმა კოორდინატორმა.
მისივე შეფასებით, კენჭისყრის დღე პროცედურულად ზოგადად კარგად იყო ორგანიზებული და ადმინისტრირებული, მაგრამ ასევე მას თან ახლდა დაძაბული გარემო.
„გუშინ პირველად მოხდა, რომ ელექტრონული მოწყობილობები გამოიყენეს საარჩევნო უბნების უმეტესობაში და საარჩევნო ადმინისტრაციამ საკმაოდ მნიშვნელოვანი ძალისხმევა განახორციელა იმისათვის, რომ ამომრჩევლებისთვის მიეწოდებინა ინფორმაცია კენჭისყრის დღემდე”, – აღნიშნა ალიზარდმა.