როგორ ფიქრობთ, 1 120 000 ადამიანი ვინმეს დაუთმობს, რომ მისი ხმა წაართვან? რა თქმა უნდა, არა, – განაცხადა „ქართული ოცნების“ პოლიტსაბჭოს წევრმა, საქართველოს პარლამენტის თავმჯდომარემ შალვა პაპუაშვილმა პასუხად კითხვაზე, რამდენად აქვს შანსი ოპოზიციას, რომელიც არჩევნებს არალეგიტიმურად აცხადებს, აქციებით შედეგს მიაღწიოს.
„1 120 000-მა ადამიანმა მისცა ქართულ ოცნებას ხმა. როგორ ფიქრობთ, 1 120 000 ადამიანი ვინმეს დაუთმობს, რომ მისი ხმა წაართვან? რა თქმა უნდა, არა. ხელისუფლების ამოცანაც სწორედ ეს არის, რომ არავის მისცეს შესაძლებლობა, წაართვან ხმა საქართველოს მოქალაქეებს და ამოატრიალონ დემოკრატიული არჩევანი ამ ქვეყნის და ეს არჩევანი მკაფიოა.
რაც არ უნდა ისაუბრონ რაიმე დარღვევაზე, ხვალ იწურება საჩივრების საბოლოო ვადა, ყველა ვნახავთ, რა საჩივრებია, ცესკო განიხილავს ამას, ყველა დააკვირდება.
ზოგიერთი მაგალითი მოგახსენეთ, რამდენად აბსურდულია ის სქემა, რომელსაც თენგო დიდი ხანი შიფრავდა და ბოლოს თავად ვერ გაშიფრა და მოუწია ქალბატონ ლონდას, რომ გაეშიფრა ეს სქემა და აბსოლუტური სისულელეები ილაპარაკეს ამ ყველაფერთან დაკავშირებით.
1 120 000 ადამიანის ნებას ვერავინ გადააბიჯებს ვერც ქვეყნის გარედან და რა თქმა უნდა, ვერც ქვეყნის შიგნით. ასეთი აქცია გვინახავს ბევრი. ზუსტად იმავე პოლიტიკური ჯგუფების და „ენჯეოების“ აქცია ვნახეთ 2022 წლის თებერვალ-მარტში, როდესაც ასევე მათი მხარდამჭერები ითხოვდნენ, რომ გაგვეგზავნა მეომრები უკრაინაში და ომში ჩავრთულიყავით. ითხოვდნენ, რომ სანქციები დაგვეწესებინა. იქაც ხალხი იდგა, ისიც მოქალაქეები იყვნენ, მაგრამ ისინი რასაც მოითხოვდნენ, ეს იყო ქვეყნის განადგურება და დაღუპვა. ჩვენ რა თქმა უნდა, ვერ ავყვებით ისეთ მოთხოვნებს და მოქალაქეების ისეთ აზრებს, რომლებიც ქვეყანაში დემოკრატიას გაანადგურებს“, – განაცხადა შალვა პაპუაშვილმა.