ძალიან მკაფიოდ იკვეთება გარე ჩარევა, მათ შორის პოსტსაარჩევნო პერიოდში. ეს ჩარევა კითხვის ნიშნის ქვეშ აყენებს საერთაშორისო სადამკვირვებლო მისიების ზოგადად არსებობას, – განაცხადა „დღის ქრონიკაში“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ.
„ჩვენ, ყველამ კარგად ვიცით, რომ დემოკრატიულ სახელმწიფოში არჩევნების ჩატარებაზე სადამკვირვებლო მისიები აკეთებენ კომენტარებს და სწორედ მათზე დაყრდნობით ხდება არჩევნების შეფასება. ჩვენ მეორე დღესვე მოვისმინეთ ეუთო/ოდირი, ნატოს, ევროკავშირისა და დამოუკიდებელი, უცხოელი დამკვირვებლების დასკვნები, საიდანაც ნათლად იკითხებოდა, რომ არჩევნები ჩატარდა მშვიდ გარემოში, ზოგადად შეფასდა, როგორც დადებითად. ამ არჩევნებს, უპრეცედენტო რაოდენობის დამკვირვებელი აკვირდებოდნენ როგორც შიდა, ასევე გარე.
დღეს რასაც ვაკვირდებით, ეს არის წინასწარ გაწერილი სცენარი, რომლის მთავარი მიზანია, ჩვენი რადიკალების მოსაზრებით, არის ქუჩის აქციები, რომელიც რაღაც უბედურებაში უნდა გადაიზარდოს“, აღნიშნა მაია ბითაძემ.
„კოალიცია ცვლილებისთვის“ ერთ-ერთი ლიდერი, ნიკა გვარამია სოციალურ ქსელში წერს, რომ ქუჩა არის ერთადერთი ადგილი, სადაც სახელმწიფოს ბედი წყდება იმ ვითარებაში, როცა ყველა სხვა დემოკრატიული ინსტიტუტი მიტაცებულია.
საქართველოში საპარლამენტო არჩევნები 26 ოქტომბერს ჩატარდა. ცესკოს პირველადი მონაცემებით, ხმათა უმრავლესობა, 53,931 პროცენტი „ქართულმა ოცნებამ“ მიიღო, მეორე ადგილზე კი 11.035% პროცენტით გავიდა კოალიცია ცვლილებისთვის გვარამია მელია გირჩი დროა. საარჩევნო ბარიერი ასევე გადალახეს პოლიტიკურმა სუბიექტებმა „ერთიანობა-ნაციონალური მოძრაობამ“, „ძლიერი საქართველო-ლელო, ხალხისთვის, თავისუფლებისთვის!“, „გახარია საქართველოსთვის“.