უკრაინის პრეზიდენტმა დაადასტურა, რომ კიევი შეერთებულ შტატებს „ტომაჰავკის“ ტიპის რაკეტებს სთხოვდა. სკანდინავიური მედიასაშუალებების წარმომადგენლებთან შეხვედრისას ვოლოდიმირ ზელენსკიმ განაცხადა, რომ ე.წ. „გამარჯვების გეგმის“ ფარგლებში უკრაინას „ტომაჰავკების“ მიღებაც სურდა, რაც მისი თქმით, კონფიდენციალურად უნდა დარჩენილიყო, თუმცა ასე არ მოხდა.
„ხედავთ, რაც ხდება ახლა მედიაში. წერენ, რომ უკრაინას სურდა ბევრი რაკეტა, „ტომოჰავკები“, მაგრამ ეს იყო კონფიდენციალური ინფორმაცია კიევსა და ვაშინგტონს შორის. გამოდის, რომ პარტნიორებს შორის აღარაფერია კონფიდენციალური“, – განაცხადა ზელენსკიმ.
მანამდე გამოცემა New York Times-მა თეთრ სახლში წყაროზე დაყრდნობით გაავრცელა ინფორმაცია, რომ კიევი ვაშინგტონთან „ტომაჰავკების“ გადაცემაზე აწარმოებდა მოლაპარაკებას, რაზეც უარი მიიღო.