აშშ-ის ყოფილმა პრეზიდენტმა და „რესპუბლიკური“ პარტიის საპრეზიდენტო კანდიდატმა, დონალდ ტრამპმა განაცხადა, რომ პენსილვანიის შტატში არჩევნებთან დაკავშირებულ თაღლითობას აქვს ადგილი.
„ეს კანონის სისხლისსამართლებრივი დარღვევაა. შეწყვიტეთ თაღლითობა! ვინ იფიქრებდა, რომ ჩვენი ქვეყანა ასეთი კორუმპირებულია?“ – აღნიშნა დონალდ ტრამპმა.
პენსილვანიის შტატში, სამართალდამცველები პოტენციურად გაყალბებულ საარჩევნო მასალებს იძიებენ.
როგორც ლანკასტერის, ასევე იორკის ოლქის საოლქო პროკურორები და საარჩევნო ადმინისტრაციის ოფიციალური პირები იკვლევენ არჩევნებთან დაკავშირებულ პოტენციურ თაღლითობას მას შემდეგ, რაც საარჩევნო ადმინისტრაციამ მიიღო ამომრჩეველთა რეგისტრაციის მასალების დიდი პარტია „მესამე მხარის ორგანიზაციისგან“.
ლანკასტერის ოლქში, საოლქო პროკურორმა და ლანკასტერის ოლქის საარჩევნო საბჭომ გასულ კვირას გამართეს პრესკონფერენცია, სადაც გამოაცხადეს ამომრჩეველთა რეგისტრაციის ფორმებთან დაკავშირებით პოტენციური თაღლითობის გამოძიება.
„თანამშრომლებმა შეამჩნიეს, რომ უამრავ განაცხადს, როგორც ჩანს, იგივე ხელწერა ჰქონდა და იმავე დღეს იყო შევსებული“, – განაცხადა საოლქო პროკურორმა, ჰიზერ ადამსმა.
ოლქის კომისარმა, ჯოშ პარსონსმა განაცხადა, რომ გაყალბებული რეგისტრაციის ფორმები წარმოადგენს საფრთხეს საარჩევნო პროცესისთვის.
„ჩვენ ვიცით, რომ ეს საფრთხეს უქმნის ჩვენს საარჩევნო სისტემას. ეს არის თავდასხმა ჩვენს საარჩევნო სისტემაზე“, – აღნიშნა მან.
