ლატვიის სახელმწიფო საზღვრის დაცვის ინფორმაციით, გუშინ, საღამოს, კრასლავის ოლქის შკაუნსკის მუნიციპალიტეტში, საზღვრის 25 დამრღვევი და ორი გადამყვანი დააკავეს. ისინი იყენებდნენ მანქანას, რომელსაც საზღვრის დაცვის სამსახურის მანქანის ყალბი „ამოსაცნობი ნიშნები“ ჰქონდა.
31 ოქტომბრის საღამოს, მესაზღვრეებმა, რომლებიც სასაზღვრო ტერიტორიების მონიტორინგს ახორციელებდნენ, კრასლავის რეგიონის შკაუსკნის მუნიციპალიტეტში, საზღვრის დაცვის მანქანასთან მიმსგავსებული ავტომობილი გააჩერეს. ის საზღვრის დაცვის სამსახურის მანქანის ფერებში იყო შეღებილი და ჰქონდა გაყალბებული სანომრე ნიშანი, რომელიც სასაზღვრო სამსახურის რეალურ მანქანას ეკუთვნოდა. Renault Master-ის მიკროავტობუსით საზღვრის სავარაუდო დამრღვევები გადაჰყავდათ.
სასაზღვრო სამსახურმა საზღვრის 25 დამრღვევი და ორი გადამყვანი – მძღოლი და მგზავრი – დააკავა. დოკუმენტების შემოწმებისას დადგინდა, რომ ორივე გადამყვანი უკრაინის მოქალაქეა.
ასევე გაირკვა, რომ ისინი აზიური წარმოშობის 25 ადამიანის გადაყვანას ცდილობდნენ, რომლებმაც ბელარუს-ლატვიის საზღვარი უკანონოდ გადაკვეთეს და მესაზღვრეების მიერ გაჩერებულ მანქანასთან ახლოს იმყოფებოდნენ.
სახელმწიფო მესაზღვრეებმა გადამყვანების წინააღმდეგ აღძრეს სისხლის სამართლის საქმე სსკ-ს 285.1 (3) მუხლის მიხედვით, რომელიც ხუთი და მეტი პირისთვის ლატვიის რესპუბლიკაში უკანონოდ ყოფნის შესაძლებლობის შეგნებულად მიცემას შეეხება.
სატელევიზიო გადაცემა „Rigata panorama“-სთვის მიცემულ ინტერვიუში, ლატვიის შინაგან საქმეთა მინისტრმა, რიჩარდს კოზლოვსკისმა განაცხადა, რომ წელს ლატვიაში საზღვრის უკანონოდ გადაკვეთის 5-6 ათასზე მეტი მცდელობა დაფიქსირდა და ამ კუთხით, სიტუაცია უკეთესობისკენ არ იცვლება.
კოზლოვსკისი აცხადებს, რომ „ორგანიზებული დანაშაულის ქსელი ასეთ რისკზე დიდი მოგების მიღების მიზნით მიდის“.
„სამწუხაროდ, ასეთი რამ ყოველთვის ხდება ამ უკანონო ბიზნესში, რომელიც მილიარდები ღირს. ასეთია რეალობა. აშკარაა, რომ მათ ვერც ის სასჯელი აჩერებთ, რომელიც უკვე გავამკაცრეთ – ახლა ასეთი საქმიანობა თავისუფლების 10 წლით აღკვეთას ითვალისწინებს. ეიზკრაუკლესთან მომხდარი შემთხვევა რომ გავანალიზოთ, თუ ეს ადამიანები თავიანთ განზრახვას სისრულეში მოიყვანდნენ, ეს მათ, ალბათ, ძალიან დიდი შემოსავალს მოუტანდა. აქედან გამომდინარე, აშკარაა, რომ ისინი მზად არიან ასეთ რისკზე წავიდნენ“.
„ამ შემთხვევაში, სიფხიზლე გამოვავლინეთ და ამ დანაშაულის განგრძობადობა თავიდან ავიცილეთ“, – განაცხადა მინისტრმა.
კონტექსტი:
8 ოქტომბერს, ლატვიის სახელმწიფო პოლიციამ, საზღვრის დაცვის სამსახურთან თანამშრომლობის ფარგლებში, ჩაატარა სპეცოპერაცია „ჩასაფრება“, რომლის დროსაც, ბელორუს-ლატვიის საზღვრიდან აედევნა და დააკავა 46 მიგრანტი და ორი გადამყვანი. მათ უკანონოდ გადმოკვეთეს სახელმწიფო საზღვარი, რისთვისაც პოლიციის მანქანის საიდენტიფიკაციო საღებავი და სანომრე ნიშნები გამოიყენეს.
ამ სპეცოპერაციის დროს, საზღვრის ორი დამრღვევი მოკლეს, მიგრანტების 2 უკანონოდ გადამყვანი კი დააკავეს.