დღევანდელ გადაცემაში დეტალურად მოგიყვებით რა მიზანს ემსახურება გამოგონილი ამბავი 2024 წლის არჩევნების გაყალბებაზე. პოლიტიკურად განულებულ „კოლექტიურ ნაცმოძრაობას“ რომ დასაკარგი აღარაფერი დარჩა, ბოლო კვირის განცხადებებმა კიდევ ერთხელ დაადასტურა, – განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ.
„პირველი რეპორტაჟის თემა „ორკესტრირებული შეტევა“ – თავდასხმა ღირებულებებზე, რომლის დაცვაც ასე ანერვიულებთ და აშინებთ ე.წ მეგობრებს და მათი დავლებების უსიტყვო შემსრულებლებს რადიკალურ ოპოზიციაში. ფაქტია „ქართული ოცნების“ მიერ მიღებული ორი კანონი, პლუს ეროვნული პოზიცია, რომ ჩვენი ქვეყანა აღიქვან თანასწორად, დასავლელი ბიუროკრატებისთვის აქილევსის ქუსლად იქცა და ვაჭრობის სხვა მასშტაბზე გადავიდნენ.
თუ გაიწვევთ კანონებს, ანუ თუ არ აიკრძალება ლგბტ პროპაგანდა და ენჯეო სექტორის ფინანსებიც გაუმჭვირვალე იქნება – არჩევნების ლეგიტიმაციაზე კითხვები აღარავის ექნება, მეტიც ქვეყნები მილოცვების და შედეგების აღიარების რიგშიც ჩადგებიან. ვიზალიბერალიზაციით შანტაჟიც შეწყდება.
ეს უდევს საფუძვლად იმას, რომ რამდენიმე დღის წინ რადიკალები პატრონების ენით უკვე თამამად ალაპარაკდნენ. ლგბტ პროპაგანდის აკრძალვაზე არჩევნებამდე იძულებით შენარჩუნებული დუმილი ოპოზიციამ ევროპელი ლიდერების ულტიმატუმის ფონზე დაარღვია.
მიუხედავად იმისა, რომ დღემდე ვერავინ ბედავს გარდა მმართველი პარტიისა, თქვას სიმართლე რომ ქვეყნის ევროპული გზა არც გამჭვირვალობის და არც ლგბტ პროპაგანდის წინააღმდეგ მიღებულ კანონებზე გადის.
„სამშობლო არ იყიდება“ – ხელისუფლების კატეგორიული უარი ქართველი ხალხის ნებით მიღებული კანონების გაუქმების მოთხოვნაზე“, – აღნიშნა ირაკლი ჩიხლაძემ.