საბოლოო შედეგებით, დონალდ ტრამპმა ხმების 50.4% მიიღო და ამერიკის შეერთებული შტატების 47-ე პრეზიდენტი გახდა. ამ მონაცემებით თუ ვიმსჯელებთ, შეგვიძლია თამამად ვთქვათ, რომ კომპანია „ედისონ რისერჩმა“, როგორც საქართველოში, ასევე აშშ-ში, არასწორი ეგზიტპოლის შედეგები გაავრცელა. კერძოდ, „ედისონ რისერჩს“, აშშ-ის არჩევნების შემთხვევაში 6%-იანი ცდომილება აქვს, რადგან მის მიერ არჩევნების დღეს ეროვნულ დონეზე ჩატარებული გამოკითხვის მიხედვით, ტრამპს 44% უჭერდა მხარს, ხოლო ჰარისს – 48 %, – აღნიშნა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ.
მისივე თქმით, ორგანიზაციის მიერ გავრცელებული მონაცემებით, გადამწყვეტ შტატებში კამალა ჰარისი იგებდა, თუმცა, ოფიციალური მონაცემები ამ შემთხვევაშიც არ დაემთხვა კვლევის შედეგებს და ტრამპმა გაიმარჯვა.
„ცდომილება მეტია საქართველოს შემთხვევაში. დავით კეზერაშვილის „ფორმულას“ დაკვეთით, „ედისონ რისერჩის“ მიერ ჩატარებული კვლევის მონაცემების მიხედვით, „ქართულ ოცნებას“ 40.9% უჭერდა მხარს, ეს მაშინ, როდესაც მმართველმა გუნდმა ცესკოს მონაცემებით 53,93% აიღო.
შეგახსენებთ, რომ მმართველი გუნდის ლიდერების მხრიდან არაერთხელ გაკეთდა განცხადებები იმის შესახებ, რომ ეგზიტპოლის შედეგები „ედისონ რისერჩს“ საქართველოშიც და ამერიკაშიც გააყალბებინეს.
რაში დასჭირდა ორგანიზაციას რეპუტაციის ასე შელახვა და რა დგას გაყალბებული მონაცემების უკან, ფული თუ პოლიტიკური კორუფცია, მმართველი გუნდის წარმომადგენლების განცხადებით, სწორედ ეს უკანასკნელია გამოსაძიებელი.
ჩნდება კითხვა, ვის არ აწყობდა მშვიდობის პოლიტიკის გამარჯვება, მაგრამ შედეგი უკვე სახეზეა, გაიმარჯვა მშვიდობამ და ახლა მთელი მსოფლიო ელოდება დონალდ ტრამპის შეთავაზებულ დღის წესრიგს“, – განაცხადა ჩიხლაძემ.