“ევროკავშირში ვწევრიანდებით პრინციპებიდან გამომდინარე და არა მაინც და მაინც იმიტომ, რომ ევროკავშირი ჰქვია”

ჩვენ ევროკავშირში ვწევრიანდებით პრინციპებიდან გამომდინარე და არა მაინც და მაინც იმიტომ, რომ ამას ევროკავშირი ჰქვია. ევროკავშირი საინტერესოა იმიტომ, რომ იქ გარკვეული პრინციპები, გარკვეული ფასეულობები ჩვენთვის იდენტური და ღირებულია. აქედან გამომდინარე, უნდა მოიხსნას პირობა, რომელიც გამჭვირვალობის კანონთან დაკავშირებით დადგა, – განაცხადა გადაცემაში „იმედი LIVE“ საპროცედურო საკითხთა და წესების საპარლამენტო კომიტეტის თავმჯდომარემ, ირაკლი ქადაგიშვილმა, რომელიც ევროპელი ლიდერების მიერ გამჭვირვალობისა და ლგბტ პროპაგანდის საწინააღმდეგო კანონების გაუქმებასთან დაკავშირებით გამოთქმულ მოთხოვნას გამოეხმაურა.

„მათი პირველი პირობა იყო, რომ უნდა ჩატარდეს არჩევნები. მათ მშვენივრად დაინახეს, რომ ეს არჩევნები ჩატარდა და დანარჩენი არის სპეკულაცია. ახლა გარკვეულწილად დაიწყეს პოლიტიკური ვაჭრობა. ანუ, ჩვენი პოზიცია არის ძალიან მარტივი – ჩვენ ევროკავშირში ვწევრიანდებით პრინციპებიდან გამომდინარე და არა მაინც და მაინც იმიტომ, რომ ამას ევროკავშირი ჰქვია. ევროკავშირი საინტერესოა იმიტომ, რომ იქ გარკვეული პრინციპები, გარკვეული ფასეულობები ჩვენთვის იდენტური და ღირებულია. აქედან გამომდინარე, უნდა მოიხსნას პირობა, რომელიც გამჭვირვალობის კანონთან დაკავშირებით დადგა, როდესაც გვითხრეს, რომ განხილვას არ ექვემდებარება ეს კანონი, რადგან არის რუსული. აქედან გამომდინარე, ეს კანონი განხილვას უნდა დაექვემდებაროს – რატომ არის ზოგადად გამჭვირვალობა ანტიევროპული, ანტიდემოკრატიული, ანტიჰუმანური მოვლენა. ეს ნიშნავს, რომ ან ჩვენ ბრმად უნდა ვიაროთ – ბრმად სიარული საბოლოო ჯამში, გადაჩეხას ნიშნავს ამ ჯერზე თუ არა, შემდეგ ჯერზე, ან ჩვენთან ურთიერთობაში უნდა იყოს ელემენტარული პატივისცემა, არგუმენტით საუბარი და არგუმენტების გაზიარება. ჩემიც და მისიც, რა თქმა უნდა. ჩვენ არ ვამბობთ, რომ ჩვენი არგუმენტია ერთადერთი. სხვისი არგუმენტიც არგუმენტია. ამიტომ ვამბობთ, ეს უნდა იყოს ახსნილი“, – განაცხადა ქადაგიშვილმა