აშშ-ისა და პოლონეთის ოფიციალურმა პირებმა ქვეყნის ჩრდილოეთით ნატოს სარაკეტო თავდაცვის ბაზა გახსნეს. ინფორმაციას Associated Press-ი ავრცელებს.
პოლონეთში ამერიკული სარაკეტო თავდაცვის ბაზის გახსნის იდეა, რომელიც ნატოსთან სრულად თავსებადია, აშშ-ის ყოფილ პრეზიდენტს ჯორჯ ბუშ უმცროსს ეკუთვნის. ჩანაფიქრის თანახმად, ბაზას ევროპა ირანიდან მომდინარე საფრთხეებისგან უნდა დაეცვა.
თავის მხრივ, პოლონეთი ამ ბაზას რუსეთისგან მომდინარე საფრთხისგან დასაცავ ობიექტად აღიქვამს. ეს შიშები რუსეთის უკრაინაში შეჭრის შემდეგ გამძაფრდა.
რუსეთი პროექტს თავიდანვე ეწინააღმდეგებოდა. კრემლში ბაზას საფრთხედ აღიქვამენ და აცხადებენ, რომ მათ ზომების მიღება მოუწევთ, „რათა პარიტეტი აღადგინონ“.
„მთელი მსოფლიო ნათლად დაინახავს, რომ ეს რუსეთის ინტერესების სფეროს აღარ წარმოადგენს. პოლონეთის თვალთახედვით, ეს არის სტრატეგიულად ყველაზე მნიშვნელოვანი რამ“, – განაცხადა პოლონეთის პრეზიდენტმა ანდჟეი დუდამ ბაზის გახსნის ცერემონიაზე, რომელიც სოფელ რედზიკოვოში გაიმართა.