ემანუელ მაკრონის განცხადებით, აშშ-სა და ევროპას შორის ტარიფების ომები გარდაუვალია. იტალიის ყოფილი პრემიერ-მინისტრი მარიო დრაგი კი შიშობს, რომ ტრამპი ევროკავშირს ჩინეთსა და აშშ-ს შორის არჩევანის გაკეთებას მოსთხოვს. ინფორმაციას „პოლიტიკო“ ავრცელებს.
მარიო დრაგი და ემანუელ მაკრონი აფრთხილებენ ევროპას, სწრაფად მოემზადოს დონალდ ტრამპთან სავაჭრო ომის მეორე რაუნდისთვის.
პრესტიჟულ „კოლეჟ დე ფრანსში“ გამართული ერთსაათიანი საუბრისას ევროპის ცენტრალური ბანკის ყოფილმა იტალიელმა ხელმძღვანელმა და საფრანგეთის პრეზიდენტმა მოუწოდეს ევროკავშირს, გააძლიეროს პოზიციები, რათა აშშ-სა და ჩინეთს შორის მოსალოდნელ სავაჭრო ომში მსხვერპლად არ იქცეს.
„პოლიტიკოს“ ცნობით, ტრამპი ამერიკის მზარდი დეფიციტს შემცირებას აშშ-ში იმპორტზე 10-დან 20 პროცენტამდე ტარიფის დაწესებით აპირებს, ხოლო ჩინეთიდან იმპორტზე, შესაძლოა, 60-პროცენტიანი ტარიფი შემოიღოს.
„ჩვენ მკვეთრად შევდივართ სატარიფო ომების სამყაროში“, – განაცხადა მაკრონმა.
საფრანგეთის პრეზიდენტმა განაცხადა, რომ ტრამპი, შეიძლება, შეეცადოს „ევროპელების იძულებას ჩინეთთან სწრაფად დასაშორებლად“, რასაც ის ევროპისთვის ტარიფების დაწესების მუქარით გააკეთებს, თუ ევროპა პეკინთან ვაჭრობას გააგრძელებს.
მაკრონის თქმით, ამან, შეიძლება, გააღრმაოს დაპირისპირება ევროკავშირის იმ ქვეყნებს შორის, რომლებსაც ჩინეთთან უფრო მჭიდრო სავაჭრო კავშირები აქვთ და მათ შორის, ვინც ვაშინგტონთან არიან ახლოს.
იტალიის ყოფილი პრემიერ-მინისტრის, მარიო დრაგის თქმით, ტრამპი ზეწოლას მოახდენს ევროპაზე, რათა აირჩიოს მხარე აშშ-სა და ჩინეთს შორის.