ცესკოს თავმჯდომარეზე თავდასხმით, [რის შემდეგაც ამ თავდამსხმელზე საქმე აღიძრა], გამოჩნდა, რომ არავის არაფერი ეპატიება. ასევე, გამოჩნდა ისიც, თუ რა ორმაგი სტანდარტები აქვთ, გნებავთ, სალომე ზურაბიშვილს, თუ, გნებავთ – უცხოელ ელჩებს – არც ერთს არანაირი გაცხადება არ გაუკეთებია, – განაცხადა მედიასთან უმრავლესობის წევრმა გურამ მაჭარაშვილმა.
მან ცესკოს თავმჯდომარის მიმართ განხორციელებულ თავდასხმაზე ისაუბრა და აღნიშნა, რომ ფაქტია, თუ რადიკალებს ვინმე არ ეთანხმება, მას საღებავსაც შეასხამენ და „მოლოტოვის კოქტეილსაც“ ესვრიან, ამას კი ევროპულ ღირებულებებთან საერთო არაფერი აქვს.
„[უცხო ქვეყნის ელჩები, თუ, მათ შორის, სალომე ზურაბიშვილი, ამ დუმილით] რას გვეუბნებიან, რომ ცესკოს თავმჯდომარეზე თავდასხმა, რის შედეგადაც მას თვალი დაუზიანდა, ევროპული ღირებულებაა? ეს რა სტანდარტია, გვიპასუხონ. როცა აქციის მონაწილემ პოლიციელს „მოლოტოვს კოქტეილი“ ესროლა და ცოცხლად წვავდა, ამას გამოხატვის თავისუფლებას უწოდებდნენ და მსროლელი არ დაიჭიროთო, მოითხოვდნენ და ახლა, როცა ცესკოს თავმჯდომარეს საღებავი შეასხეს და სულ ცოტა, თვალი დაუზიანეს, ეს მორალურადაც არავის დაუგმია და არ უთქვამს, რომ მიუღებელია. ანუ, თუ [რადიკალებს] არ ეთანხმები, საღებავსაც შეგასხამენ, „მოლოტოვის კოქტეილსაც“ გესვრიან, ცოცხლად დაგწვავენ და ა.შ. – ეს არის ევროპული ღირებულება? გამობრძანდნენ ახლა ევროკავშირის ელჩი და სხვა სახელმწიფოების ელჩები, მანამდე რომ დამწკრივდნენ და იუსტიციის მინისტრთან სააკაშვილის გათავისუფლების მოთხოვნით მივიდნენ, რის შემდეგაც, სტრასბურგის სასამართლოდან მიიღეს ამაზე უარი და, სულ ცოტა, უბრალოდ, დაგმონ ცესკოს თავმჯდომარეზე თავდასხმა და თქვან, რომ არ შეიძლება ასეთი საქციელი“, – აღნიშნა გურამ მაჭარაშვილმა.