მაშინ, როდესაც უკრაინაში მიმდინარე ომის მეოთხე წელი ახლოვდება, უკრაინული ძალებისთვის მდგომარეობა მხოლოდ უარესდება, – წერს ამერიკული გაზეთი The New York Times-ი სტატიაში სათაურით რუსეთი აძლიერებს თავდასხმებს ძალაგამოლეულ უკრაინაზე.
უკრაინის უმაღლესმა სამხედრო მეთაურმა, გენერალმა ოლექსანდრ სირსკიმ ცოტა ხნის წინ განაცხადა, რომ მისი ძალები იბრძვიან რუსეთის ერთ-ერთი ყველაზე ძლიერი შეტევის შესაჩერებლად.
კვირას უკრაინამ მხარდაჭერა მიიღო, როდესაც აშშ-ის ადმინისტრაციამ განაცხადა, რომ უკრაინას ნებართვა მისცა, გამოიყენოს ამერიკული შორ მანძილზე მოქმედი იარაღი რუსეთის სიღრმეში დასარტყმელად.
თუმცა, ამერიკის პრეზიდენტად დონალდ ტრამპის არჩევამ უკრაინის ომის ძალისხმევის ბედთან დაკავშირებით გაურკვევლობის დამატებითი ფაქტორი გამოიწვია.
„ალყაში მოქცეული უკრაინის ჯარები ჩართულნი არიან თავიანთი ტერიტორიის სასტიკ და სისხლიან დაცვაში. [უკრაინელი] ჯარისკაცები და მეთაურები ამბობენ, რომ მათ შეფერხებებს უქმნის საბრძოლო ქვეითებისა და გამოცდილი ოცეულისა და ასეულის მეთაურების ნაკლებობა“, – წერს გაზეთი The New York Times-ი.
პირადი შემადგენლობის ნაკლებობის გარდა, უკრაინას აკლია საშუალო და შორ მანძილზე მოქმედი იარაღი, რომელიც საჭიროა თანმიმდევრული და ეფექტური კამპანიის გასატარებლად, რომელიც მიმართულია რუსული ლოგისტიკის, სამეთაურო და საკონტროლო ცენტრებისა და სხვა ძირითადი სამიზნეების წინააღმდეგ.
ფრონტზე უკრაინელმა ჯარისკაცებმა აღნიშნეს, რომ ბოლო კვირების განმავლობაში მათი მხრიდან საარტილერიო ცეცხლის შესამჩნევი შემცირება დაფიქსირდა.
რუსული ძალების ძალისხმევის დიდი ნაწილი ფოკუსირებულია დონეცკის ოლქში კურახოვეს აღებასა და ქალაქ პოკროვსკზე თავდასხმის მომზადებაზე.
შექმნილი ვითარების მიუხედავად, უკრაინული ძალები კვლავაც აიძულებენ რუსებს, გადაიხადონ მაღალი ფასი თითოეული წინსვლისთვის.
უკრაინა არ ასახელებს დაღუპულთა რიცხვს, მაგრამ ჯარისკაცები ამბობენ, რომ ისინი ასევე განიცდიან მძიმე დანაკარგებს თითოეულ შეტაკებაში.