ბუნებრივია, რომ სააკაშვილს ისევ ძალადობისკენ ექნება მოწოდებები, თუმცა „ნაცმოძრაობის“ მიზნებს ახდენა არ უწერია, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა განაცხადა.
იონათამიშვილის თქმით, საზოგადოებამ კარგად იცის, რომ სააკაშვილი ყველაზე მასშტაბური დამნაშავეა, რომელსაც საქართველოს წინააღმდეგ უმძიმესი დანაშაულები აქვს ჩადენილი.
„თავის დროზე ქვეყანაში მისი ლაჩრული შემოპარვაც იმით იყო განპირობებული, რომ აქ არეულობა და ესკალაცია გამოეწვია. რა თქმა უნდა, მას ისევ ძალადობისკენ ექნება მოწოდებები, რაც ბუნებრივია, მაგრამ, მეორე მხრივ, ვხედავთ, რომ ოპოზიცია გაკოტრებულია და რევოლუციის მოწყობის არანაირი რესურსი არ აქვს. „ნაცმოძრაობის“ მიზნებს ახდენა არ უწერია. ისინი არიან დიდი შავი ლაქა ქვეყნისთვის. ამ ადამიანებს არეულობის რესურსი კი არა, 10-15 ადამიანზე შეკრების მეტის რესურსი არ აქვთ. ეს მოღალატეობრივი საქმიანობის გამო დაიმსახურებს. მათ მხოლოდ ისეთი წერილების წერის რესურსი აქვთ, რაც რამდენიმე დღის წინ გააკეთეს. სწორედ ამიტომ არიან მოღალატეები“, – განაცხადა რატი იონათამიშვილმა.
საქართველოს ყოფილმა პრეზიდენტმა, მიხეილ სააკაშვილმა სასამართლო პროცესზე დისტანციურად ჩართვისას საზოგადოებას მეტი აქტიურობისკენ მოუწოდა. „უნდა შევწყვიტოთ ბალერინობის თამაში, მოვეშვათ ენის მოჩლექას, ახლა საჭიროა მიწოლა“, – განაცხადა მიხეილ სააკაშვილმა.