„ბიბისის“ ცნობით, ისრაელმა მასირებული საჰაერო თავდასხმა განახორციელა ბეირუთის ცენტრში, რასაც მსხვერპლი მოჰყვა.
ლიბანის ეროვნული საინფორმაციო სააგენტოს ინფორმაციით, ბეირუთის ბასტას უბანში რვასართულიან საცხოვრებელი შენობას ხუთი რაკეტა მოხვდა.
„ჰეზბოლას“ მიერ კონტროლირებადი მედიასაშუალება „ალ-მანარი“ ლიბანის ჯანდაცვის სამინისტროს ინფორმაციაზე დაყრდნობით იუწყება, რომ დაიღუპა ოთხი და დაშავდა 23 ადამიანი. სოციალურ ქსელებში გავრცელდა ვიდეოკადრები, სადაც დანგრეული შენობა ჩანს.
ისრაელის სამხედრო ძალებს თავდასხმასთან დაკავშირებით ჯერ კომენტარი არ გაუკეთებიათ.
მასშტაბური თავდასხმა ადგილობრივი დროით დილის 04:00 საათზე განხორციელდა და აფეთქებების ხმა მთელი ქალაქში ისმოდა. საგანგებო სამსახურები მჭიდროდ დასახლებულ ბასტას უბანში სამაშველო სამუშაოებს აწარმოებდნენ.
ცნობისთვის, ბოლო თვეების განმავლობაში ისრაელის საჰაერო თავდასხმების შედეგად ბეირუთში „ჰეზბოლას“ რამდენიმე მაღალჩინოსანი დაიღუპა, მათ შორის, დაჯგუფების ლიდერი ჰასან ნასრალა. ისრაელის თავდაცვის ძალებმა „ჰეზბოლას“ წინააღმდეგ მასშტაბური ოპერაცია სექტემბერში დაიწყეს, რომელიც მოიცავს როგორც საჰაერო დარტყმებს, ასევე სამხრეთ ლიბანში სახმელეთო ოპერაციას. ისრაელის განცხადებით, ოპერაციის მიზანია, საცხოვრებელ სახლებში დააბრუნოს დაახლოებით 60 000 მოქალაქე, რომლებიც იძულებულნი გახდნენ, დაეტოვებინათ ჩრდილოეთ ისრაელის დასახლებები „ჰეზბოლას“ თავდასხმების გამო.
ლიბანის ხელისუფლების ცნობით, კონფლიქტს ქვეყანაში 3 500-ზე მეტი ადამიანის სიცოცხლე შეეწირა და მილიონზე მეტი ადამიანი იძულებით გადაადგილებულ პირად იქცა.