„ბიბისის“ ცნობით, ამერიკელმა ინვესტორმა, სკოტ ბესენტმა, შესაძლოა, დონალდ ტრამპის ახალ ადმინისტრაციაში აშშ-ის სახაზინო დეპარტამენტის ხელმძღვანელის პოსტი დაიკავოს.
ბესენტის ამ თანამდებობაზე არჩევის შესახებ აშშ-ის არჩეულმა პრეზიდენტმა სოციალურ ქსელ „თრუს სოშიალში“ დაწერა.
ტრამპის თქმით, ბესენტი „საყოველთაო პატივისცემით სარგებლობს, როგორც მსოფლიოს ერთ-ერთი წამყვანი საერთაშორისო ინვესტორი და გეოპოლიტიკური და ეკონომიკური სტრატეგი“ და დიდი ხანია, არის ამერიკული მრეწველობისა და „ამერიკა უპირველეს ყოვლისას“ პოლიტიკის პრინციპების მხარდამჭერი.
„სკოტი მხარს დაუჭერს ჩემს პოლიტიკას, რომელიც წაახალისებს აშშ-ის კონკურენტუნარიანობის გაზრდას და შეწყვეტს უსამართლო სავაჭრო დისბალანსს, იმუშავებს ისეთი ეკონომიკის შექმნაზე, სადაც მთავარი ზრდა იქნება, განსაკუთრებით ჩვენი მომავალი მსოფლიო ენერგეტიკული ბატონობის ხარჯზე“, – განაცხადა ტრამპმა.
62 წლის ბესენტს არ აქვს მნიშვნელოვან პოლიტიკურ თანამდებობებზე მუშაობის გამოცდილება. ამჟამად ის ხელმძღვანელობს საინვესტიციო ფონდს, Key Square Management-ს.
2011-დან 2015 წლამდე ის მთავარი საინვესტიციო დირექტორის თანამდებობას იკავებდა Soros Fund Management-ში. ეს არის ერთ-ერთ მთავარი საინვესტიციო მართვის ფონდი, რომელიც მაგნატმა ჯორჯ სოროსმა დააფუძნა. Soros Fund Management-ი, სხვა პროექტებთან ერთად აფინანსებდა „ღია საზოგადოების“ ფონდების (Open Society Foundations) ზოგიერთ პროექტს.
ბესენტი თეთრი სახლის ყოფილ მეთაურს ორივე საარჩევნო კამპანიაში უჭერდა მხარს, ის ტრამპს ეთანხმება შეერთებული შტატების ეკონომიკის შესახებ შეხედულებებში, თუმცა დამკვირვებლები აღნიშნავენ, რომ ბესებტი უფრო ზომიერია მიდგომაში. კერძოდ, ინვესტორი თვლის, რომ ტრამპის მიერ დაპირებული აშშ-ში იმპორტულ პროდუქციაზე ტარიფების გაზრდა, რომლის შემოღებასაც ევროკავშირში ელოდებიან, არა აუცილებლობა, არამედ მოლაპარაკებების დროს „გავლენის ბერკეტია“.
ამასთან, ბესენტი დადებითად არის განწყობილი კრიპტოვალუტების ბაზრის მიმართ, რომელზეც ტრამპის პრეზიდენტად ხელახალმა არჩევამ უკვე მოახდინა დადებითი გავლენა.