იტალიური გაზეთი Il Fatto Quotidianoსაქართველოსა და რუმინეთში გამართულ არჩევნებს ეხმაურება სტატიაში სათაურით „რუმინეთისა და საქართველოს შემთხვევები – როდესაც დასავლეთს არ მოსწონს დემოკრატია“.
„რუმინელებმა არჩევნებში ხმა გასულ კვირას მისცეს, დღეს ისევ ხმას აძლევენ და ხვალ საკონსტიტუციო სასამართლო გადაწყვეტს, გააუქმოს თუ არა ყველაფერი. ერთ კვირაზე ნაკლებ დროში რუმინეთი ბოლო წლების განმავლობაში ყველაზე ღრმა პოლიტიკურ კრიზისში ჩავარდა და ქუჩებში დიდი საპროტესტო აქციების მოლოდინი ჩნდება. როგორც ჩანს, ბრიუსელის ყველაზე დიდი შეშფოთება მხოლოდ არჩევნების შედეგია“, – აღნიშნულია სტატიაში.
სტატიის ავტორი წერს, რომ ძალადობრივი დემონსტრაციები, დაპატიმრებებითა და დაშავებულებით, საქართველოში უკვე დღეების განმავლობაში იმართება.
„ხუთშაბათს, პრემიერ-მინისტრმა, ირაკლი კობახიძემ განაცხადა, რომ შეაჩერებს ევროკავშირში გაწევრიანების პროცესს. რუმინეთისგან განსხვავებით, საქართველოში მმართველი პარტია ბოლო არჩევნების შედეგად არ შეცვლილა. პარტია „ქართული ოცნება“ ქვეყანას 2012 წლიდან ხელმძღვანელობს, როდესაც საპარლამენტო არჩევნებში გაიმარჯვა, რითაც დაასრულა „ნაციონალური მოძრაობის“ ხანგრძლივი დომინირების პერიოდი“, – ნათქვამია სტატიაში.
სტატიის ავტორი აღნიშნავს, რომ საქართველოს პრემიერ-მინისტრმა ოპონენტები დაადანაშაულა რევოლუციის შეთქმულებაში, 2014 წლის „მაიდანის“ საპროტესტო აქციების სცენარით.
„საქართველოში „მაიდანის“ სცენარი ვერ განხორციელდება. საქართველო სახელმწიფოა და სახელმწიფო ამას, რა თქმა უნდა, არ დაუშვებს“, – განაცხადა ირაკლი კობახიძემ.
სტატიის ავტორი ამტკიცებს, რომ მას შემდეგ, რაც „ქართული ოცნების“ პოზიციები უფრო „კონსერვატიული და ნაციონალისტური“ გახდა, საქართველოს მთავრობა ბრიუსელისთვის „მტერი და საფრთხე“ გახდა.