ტელეკომპანია „იმედის“ წამყვანმა და ჟურნალისტმა ვარლამ წიკლაურმა გადაცემაში „იმედი LIVE“ პირველი არხის შენობასთან აქციის მონაწილეების მხრიდან მის მიმართ გამოჩენილი აგრესიის მიზეზებზე კიდევ ერთხელ ისაუბრა.
მისივე თქმით, „იმედში“ მუშაობა მას ეამაყება.
„მინდა ყველამ იცოდეს, რომ გვეამაყება ამ არხზე მუშაობა და ყველა დღე არის ჩვენთვის განსაკუთრებული. მე ნამდვილად მიხარია, რომ ამ არხის თანამშრომელი ვარ. უკვე მე-9 წელია და ძალიან ძვირფასია ტელეკომპანია „იმედი“ ჩვენთვის.
ტელეკომპანია „იმედს“ ახსოვს უმძიმესი დღეები, უმძიმესი 7 ნოემბერი. ჩემი კოლეგები დღემდე აქ მუშაობენ, ვინც ეს ყველაფერი საკუთარ თავზე გამოცადა. არავის ეგონოს, რომ ვინმეს აქ მუშაობა რცხვენია, როგორც თვითონ ამბობენ, ან არის რაიმე სასირცხვილო. არა! ჩვენ ვაშუქებთ ყველაფერს, რაც ხდება და ვართ ყველგან სადაც უნდა ვიყოთ“, – განაცხადა წიკლაურმა.
მან მადლობა გადაუხადა ტელეკომპანია „იმედის“ ერთგულ მაყურებელს.
„ყოველ ნაბიჯზე ვგრძნობთ მაყურებლის სიყვარულს და ყველაზე დიდი ბედნიერება ესაა, რადგან ჩვენ მათ გარეშე არაფერი ვიქნებოდით და ეს ეტყობა ჩვენს რეიტინგებს.
როდესაც ქუჩაში გვხვდება ჩვენი მაყურებელი და მეუბნება ამ სიტყვებს – გვეამაყებით, რომ ხართ, ეს ჩემთვის ყველაფერს ნიშნავს. ასე, რომ მინდა, იცოდნენ იმ ადამიანებმა, ვინც გვერჩის და აგრესიულობით გამოირჩევიან, რომ არ გვეშინია. ამ აგრესიით ვერ შეგვაშინებთ და უფრო მეტ სტიმულს გვაძლევთ, რომ ვიყოთ, მყარად – „იმედი“ იყოს ძალიან დიდხანს, რადგან ამ არხის დამფუძნებელს თავიდანვე ჰქონდა ის გათვლა, რომ იმედი უნდა ყოფილიყო და იმედი იქნება ყოველთვის“, – აღნიშნა წიკლაურმა.