კონკრეტული პირის სახლიდან ამოიღეს ცეცხლსასროლი იარაღი, რომელიც დავით კეზერაშვილს უკავშირდება. ყველაფერი მეტყველებს იმაზე, რომ მითი იმის შესახებ, თითქოს საქართველოში მშვიდობიანი აქციებით აპროტესტებდა რადიკალური ოპოზიცია რაღაც გადაწყვეტილებებს, არის მტკნარი სიცრუე, – განაცხადა პარლამენტის საპროცედურო საკითხთა კომიტეტის თავმჯდომარემ დავით მათიკაშვილმა.
„საგამოძიებო მოქმედებების შედეგად, ცალსახად გამოიკვეთა ის უტყუარი ფაქტი, რომ საპროტესტო აქცია და ძალადობრივი ქმედებები, რასაც ჩვენი საზოგადოება აკვირდებოდა ამ დღეების განმავლობაში, იყო სწორედ რადიკალური ოპოზიციის მიერ ორგანიზებული და დაგეგმილი. ყველა ინვენტარი ამ ძალადობისთვის ინახებოდა მათ ოფისებში, სახლებში. როგორც საზოგადოებისთვის გახდა ცნობილი, კონკრეტული პირის სახლიდან ამოიღეს ცეცხლსასროლი იარაღი, რომელიც დავით კეზერაშვილს უკავშირდება. ყველაფერი მეტყველებს იმაზე, რომ მითი იმის შესახებ, თითქოს საქართველოში მშვიდობიანი აქციებით აპროტესტებდა რადიკალური ოპოზიცია რაღაც გადაწყვეტილებებს, არის მტკნარი სიცრუე“, – აღნიშნა მათიკაშვილმა.
თავდაცვის ყოფილი მინისტრის, დავით კეზერაშვილის ოჯახის წევრის მფლობელობაში არსებული, ამაღლების ქუჩა N12-ში მდებარე საცხოვრებელი სახლის ჩხრეკის დროს, სადაც ბოლო წლების განმავლობაში ცხოვრობდა დავით კეზერაშვილის ცოლის ძმა დიმიტრი ჩიქოვანი, სამართალდამცველებმა საცხოვრებელ ბინაში მოწყობილი სპეციალური სამალავიდან ამოიღეს როგორც რეგისტრირებული, ასევე, რამდენიმე ათეული არარეგისტრირებული ცეცხლსასროლი იარაღი, მაყუჩები, საბრძოლო ვაზნები, კომპიუტერული ტექნიკა და მეხსიერების ბარათი.